Владата со мерки за состојбата со пожарите

Oд 3 август годинава се воведува забрана за влез и движење во шумите за сите физички лица, а за прекршителите предвидени се високи казни

Владата на Република Македонија донесе одлука од 3 август годинава да се воведе забрана за влез и движење во шумите за сите физички лица. Забраната ќе важи до следното донесување на нова одлука, а за прекршителите предвидени се високи казни.
На барање на Дирекцијата за заштита и спасување, рече на денешната прес-конференција владиниот портпарол Александар Ѓорѓиев, Владата обезбеди 10 милиони денари за исплата на надомест за ангажирани обврзници за гасење пожари, резервни делови и прегледи на авиони и телефонски трошоци.

Владата, информираше Ѓорѓиев, одлучи од задолжителните резерви на нафта и нафтени деривати за гаснење на пожарите да отстапи 28.000 литри бензин БМБ и 98.200 литри дизел гориво.

- Се задолжува Дирекцијата за заштита и спасување во соработка со ЈП „Македонски шуми“ во текот на денешниот ден да достават до Министерството за одбрана и АРМ критични региони за надлетување и следење, а Министерството за одбрана се задолжува во наредниот период да врши надлетување и следење на регионите кои ќе бидат доставени. ЈП „Македонски шуми“ е овластено дополнително да ангажира работници за следење на ситуацијата и нивно вклучување во евентуални акции за спречување пожари, рече Ѓорѓиев.

Тој информира дека е формирана и работна група која во рок од 30 дена треба да изврши анализа на сите законски и подзаконски акти од аспект на надлежност во ситуација на пожари и поплави и да предложат мерки за подобрување на можностите за интервенција и превенција, со казнени мерки доколку има непочитување.

Ѓорѓиев потенцираше дека се задолжуваат Дирекцијата за заштита и спасување, Министерството за земјоделство, шумарство и водостопанство, Државниот инспекторат за шумарство и ловство и Шумската полиција во рок од седум дена од усвојување на оваа информација да достават детална информација за извршени контроли, како и информација за нивото на опременост на шумската полиција.

- ЈП „Македонски железници-Инфраструктура“ ќе преземе активности за отстранување, односно уништување на целата вегетација во близина на железничките пруги, која може да претставува опасност за предизвикување пожари. Претпријатието во рок од пет дена од усвојување на оваа информација ќе треба еден воз со цистерни за гасење пожари да постави на железничката станица во Велес и по потреба да биде активиран, нагласи Ѓорѓиев.

Владата ги задолжува МО и МВР доколку е потребно да вршат превоз на републички сили за заштита и спасување до опожарените површини. Во случај на опасност од појава на пожари и натаму може да се пријавува на бесплатниот телефонски број 195.

Ѓорѓиев информираше дека се препорачува општините постојано да ја следат состојбата во однос на пожарите и покрај територијалните противпожарни единици, да формираат и противпожарни единици од сезонски пожарникари.

- Владата потсетува дека, согласно законите за ловство, најстрого се забранува палење стрништа на отворено. За непочитување на оваа норма ќе следуваат најстроги санкции. Остануваме будно да ги следиме состојбите и да се интервенира кога ќе има потреба за тоа, подвлече Ѓорѓиев.