Ливерпул самоуверено гази
Со победата над Болтон од 3:1 „црвените“ барем на 24 часа избија на првото место на табелата во Премиер-лигата
Ливерпул со убедливиот настап на „Енфилд“ го совлада Болтон со 3:1 и барем на 24 часа изби на чело на табелата во Премиерлигата. Во тимот на Кени Далглиш со голови се исакнаа новаците Хендерсон, Чарли Адам, а една топка зад грбот на Јуси Јескалаинен прати и Мартин Шкртел.
Хрватот Иван Класниќ ја продолжи низата почната во првото коло, па и на овој меч се запиша во листата на стрелците - погоди во судиското продолжение за утешен гол за гостите.
Победата на Ливерпул, според, прикажаната игра можеше да биде и поубедлива, но Далглиш и преполниот „Енфилд“ можеа да бидат задоволни од играта е ефикасноста.
„Беше уживање да се гледаат моите момчиња“, изјави Далглиш. Неговиот колега од спротивната страна Овен Којл исто така ја пофали играта на Ливерпул.
„Делуваа моќно. Хендерсон постигна одличен гол. Но, затоа за него Далглиш плати 20 милиони фунти“.
За разлика од Ливерпул, Челзи повторно се играше со нервите на своите навивачи, а потоа со удар од белата точка во самата завршница и со првенецот на Хуан Мата осигура бодови во дуелот со новиот прволигаш Норвич (3:1).
По ремито во првото коло и победата над Вест Бромвич на 10 минути пред крајот на мечот, и во овој натпревар „сините“ не ги одушевија фановите, кои мораше да чекаат гостинскиот голман да биде исклучен (кога го направи пеналот над Рамирес - го реализираше Лампард), па нивните миленци со играч повеќе да направат нешто повеќе.
Челзи оваа победа скапо ја плати, бидејќи во вториот дел остана без Дрогба. Репрезентативецот на Брегот Слонова Коска го извлече подебелиот крај во судирот со гостинскиот голман Џон Руди, а по долгото укажување помош и давање кислород беше изнесен на носилки од тревата.
Стартот не кажуваше дека Челзи ќе има тешка работа. Босингва го отвори резултатот, но Норвич во 63. минута израмни преку Грент Холт. Набргу потоа Морисон прокоцка стоотстотна шанса за водство. Тоа им се врати на гостите.
Резултати од 3.коло: Блекбурн - Евертон 0:1, Челзи - Норвич 3:1, Свонси - Сандерленд 0:0, Астон Вила - Вулверхемптон 0:0, Виган - Квинс Парк Ренџерс 2:0. Табела: Ливерпул 7, Челзи 7, Вулверхемптон 7, Манчестер Сити 6 (-1), Манчестер јунајтед 6 (-1)....
Ван дер Вил и млад Мексиканец во Челзи
Според британските медиуми Челзи го договорил трансферот на десниот бек Ван дер Вил од Ајакс за неверојатна сума од 32 милиони евра. Ова не е официјална вест, но официјална е онаа што вели дека репрезентативецот на Мексико Давила потпиша петгодишен договор.
Давила има 20 години и е офанзивен играч од средниоот ред, а во својот бивш клуб Чивас често играше и како напаѓач. Скаутите на англискиот тим долго го следеа, а по Светското првенство до 20 години одлучија да го купат.
„Давила е играч кој го следеа познатите светски клубови, а во последно време многу напредуваше. Одушевени сме што дојде во нашиот клуб. Убедени сме дека правилно ќе се развива и дека ќе стане еден од најважните играчи“, изјави техничкиот директор на Челзи, Еменало.
Пред Давила во Челзи дојдоа и Хуан Мата, Лукаку, и Куртис. Вчера се појави и информација дека Челзи ја кренал понудата за Лука Модриќ од Тотенхем на 40 милиони фунти. |
