Соколов промаши тројка за победа над Германија
Поразот од фаворизираниот противник во Минхен може да дејстува само инспиративно и мотивирачки пред стартот на евробаскетот
Дарко Соколов го имаше последниот шут за три поени за победа против фаворизираната Германија предводена од НБА шампионот со Далас, Дирк Новицки, но за жал промаши (68:70). И покрај тоа што Соколов не успеа да го стави каменот на круната, општ е впечатокот дека на овој натпревар одигравме одлично. Дефинитивно тоа беше настап кој може да делува само инспиративно и мотивирачки пред првиот меч против Црна Гора на евробаскетот во Литванија, кој го играме веќе в среда.
Дуелот, кој се одигра во „Олимпија Хале“ во Минхен пред околу 12.000 гледачи за кои организаторот приготви вистинска церемонија, беше неизвесен во текот на сите 40 минути.
Се играше брзо од двете страни, со чести замени и со неколку пресврти.
капитенот Перо Антиќ одлично работеше во одбраната против најдобриот играч кај Германците Дирк Новицки, кој добиваше голема заштита од судиите (голема, на работ на навредлива, велат информациите од Минхен). Како и да е, тимскиот напад, брзите контри и квалитетната завршница не доведоа до водство од највисоки девет поени пред крајот на треттата четвртина.
На средината од последниот период, на Антиќ му беш досудена петтата лична грешка, по што Германија направи серија од 7:1, но на сцена стапи Мекејлеб, кој реализираше три напади по ред и на една минута до крајот не доведе во минимално водство од 65:64. Во таа последна минута најпрвин Новицки постигна тројка, но Гечевски врати со иста мера и Германија доби последни 13 секунди со поен негатива. Шафарцик реализираше за три и ни остави само четири секунди во кои успеавме да дојдеме до шут, но како што кажавме Соколов беш непрецизен.
Перо Антиќ го заврши мечот со 11 коша и 6 скока, а исто толку оствари и Предраг Самарџиски, кој поголемиот дел од поените ги постигна со атрактивни забивања, иако беше чуван од центарот на Л.А Клиперс, Крис Кејман.
Илиевски и Мекелјеб постигнаа по 10 коша, а браќата Дамјан и Војдан Стојановски искомбинираа 15 поени. И германските медиуми пренесоа за добрата игра на нашата репрезентација, но останаа неми за поддршката од судиите кога се решаваше мечот.
Инаку, по овој натпревар македонската репрезентација отпатува за Берлин каде вчера во „О2 арената“ го играше вториот пријателски натпревар со Германија. Денеска од Берлин кошаркарската експедиција треба да отпатува за Виљнус. (Н.К)
Германија - Македонија 70:68
(18:17, 17:16, 16:20, 19:15)
Сала: „Олимпија Хале“ во Минхен, гледачи 12.000
Германија: Бензинг 9, Хербер, Хаман 4, Шулце 5, Шафарцик 9, Олбрехт 2, Шветелм 4, Плеис 3, Кејман 14, Новицки 13, Јагла, Штајгер 7.
Македонија: Мираковски 3, Илиевски 10, Соколов 2, Мекејлеб 10, В.Стојановски 7, Д.Стојановски 8, Симоновски, Гечевски 6, Антиќ 11, Самарџиски 11. Чековски. |
