Германија ќе ја амортизира рецесијата со 25 млрд. евра

БЕРЛИН - Владата на Германија планира пакет-мерки во вредност од 25 милијарди евра, што е помалку од 40-те милијарди евра претходно посочени за нови проекти, за да помогне да се издржи најголемата рецесија во Европа, објавија вчера весниците. „Зидојче цајтунг“ и „Франкфуртер рундшау“ објавија дека планот вреден 25 милијарди евра е резултат на средбата меѓу официјални лица од 16-те федерални држави во Германија и шефот на Кабинетот на канцеларката Меркел. Германија веќе истурка мерки за кои се вели дека се во вредност од 31 милијарда евра, меѓутоа владата на канцеларката Ангела Меркел е под притисок да стори многу повеќе за да ја потпомогне германската економија, која веќе е во рецесија. Некои економисти предвидуваат дека таа се соочува со најдлабоката криза по Втората светска војна.

„Зидојче цајтунг“ објави дека околу 10 милијарди евра ќе бидат искористени за намалување на придонесите во социјалното осигурување.