Ливерпул, конечно, доби нов сопственик

Славниот англиски клуб, конечно, доби нов газда. Конечно, „Енфилд роуд“ го напуштаат Том Хикс и Џорџ Џилет. Имено, претседателот на извршниот одбор на Ливерпул, Мартин Броутон потврди дека „црвените“ ја прифатиле понудата од компанијата „Њу Ингланд спортс вентчр (НЕСВ)“.

Тоа е компанија која е сопственик на безбол-екипата од МЛБ-лигата, Бостон Ред Сокс, како и поседувач на 80 отсто од акциите од НАСКАР тимот Руш Фенвеј Рејсинг, како и регионалната кабелска телевизија Њу Ингланд спортс нетворк.

Ливерпул вчера рано изутрина на својата Интернет-страница објави дека добил две понуди за купување на клубот, едната од споменатата компанија и втората од неименувана компанија од Азија, а двете се еднакво тешки - околу 300 милиони фунти. Одлуката паднала на НЕСВ. „Се сретнавме со луѓето во Бостон, Лондон и во Ливерпул. Останавме импресионирани од нивната визија за клубот. Ќе ги намират долговите и ќе можеме да се сконцентрираме на вложувањата во тимот. Тие својата победничка филозофија ја демонстрираа и со Бостон Ред Сокс“, потенцира Броутон.

Англичаните во страв, Мекларен може да се врати

„Би било неправедно од нас да отпишеме кого било, па и Стив Мекларен“, ги шокираше навивачите Тревор Брукинг, еден од главните фаци во Фудбалска��а федерација на Англија, кога станува збор за наследникот на Фабио Капело. Имено, Италијанецот најави дека за две години, кога му истекува договорот ќе си замине, па веќе почна потрагата по нов селектор. „Ако продолжи Стив да реди успеси со клубовите што ги води неговото име пак ќе фигурира на кандидатската листа“, отворен е Брукинг.

Ф.А најави дека по Италијанецот репрезентацијата мора да ја презеде Англичанец, а еден од најдобрите, барем според Ф.А, е Мекларен.

Истиот селектор, кој во 2007 година беше избркан поради катастрофално лошите резултати (не успеа да се пласира на ЕП 2008), потоа го презеде Твенте со кого го освои шампионатот на Холандија, а моментно е на чело на клупата на Волфсбург.

„Искуството во Европа му дава голема предност, а токму тоа му недостасуваше минатиот пат. Новиот селектор мора да биде Англичанец“, потврди Брукинг. Останати кандидати се Реднап, Алардајс и Хоџсон.