Денес пролет, а од утре повторно зима
Повторно пролетни температури во декември, денеска до 16 Целзиусови степени, а утре кон крајот на денот под влијание на постудена воздушна маса на некои места ќе провејува снег и температурите ќе опаднат за 2-3 степени.
Денеска ќе дува и умерен до засилен ветер од јужен правец и повремено ќе достигнува брзина од 80 километри на час. Ќе има и локални врнежи од дожд, а утринските температури ќе бидат во интервалот помеѓу 1 и 7 Целзиусови степени. Дневните ќе бидат повторно високи од 10 до 16 степени. Температурите позначително ќе опаднат од понеделник и вторник кога се очекува утринската на одделни места да се спушти и до 8 степени под нулата., а максималната дневна нема да се искачи повисоко од 9. степен.
Метеоролозите од Управата за хидрометеоролошки работи и за наредниве десетина дена најавуваат доста променливо време. Пораст на температурите се очекува в среда, а од сабота повторно пробив на студен воздух ќе донесе нивно значително опаѓање и врнежи од снег на повисоките места.
„В понеделник ќе има услови да дува умерен, а наместа и засилен северозападен ветер. В среда попладне под влијание на влажен бран од Медитеранот и низок атмосферски притисок ќе има зголемување на облачноста со врнежи од дожд и пораст особено на утринските температури. Ново заладување ќе следува в сабота кога, покрај врнежи од снег на повисоките места, ќе дува и засилен северен ветер што ќе придонесе и за значителен пад на температурите“, вели Душанка Танушевска, дежурен синоптичар во УХМР. (Сн.К.) |
