Бистата на Груев не се вклопува во битолскиот музеј
БИТОЛА - Бистата на илинденецот Даме Груев да се отстрани од дворот на битолскиот музеј за да се уреди просторот. Дислокацијата да не биде на некое друго место во Битола, туку во Демир Хисар! Ваквото барање на Заводот и музеј Битола до Општината ги скара власта и опозицијата.
„Директор од ВМРО-ДПМНЕ бара преместување на спомен-бистата на Даме Груев од дворот на музејот. И тоа не во Битола, туку во Демир Хисар. Образложението е со два збора, уредување на дворното место. Значи, основачот на историското ВМРО, Даме Груев, на директорот му пречи во екстерното уредување и му го нагрдува дворот“, заклучува Горан Милевски, советник на ЛДП во Битола.
Раководството на битолскиот Завод и музеј не одрекува дека поднело барање до општинската Комисија за спомен-обележја да се отстрани бистата на Даме Груев од дворот на музејот. Но, демантира дека побарале бистата да „замине“ за Демир Хисар.
„За бистата ќе има место во дворот на Основното училиште ’Даме Груев‘ во Битола“, изјави Зоран Николовски, директор на битолскиот музеј. Според него, годинава бил изработен нов проект, дворот на музејот кој неодамна беше ограден да биде наменет исклучиво за артефакти. Николовски вели дека тоа ќе биде импресивен лапидариум како увертира за посетителите и туристите на она што како богатство го поседува оваа институција. (А.Б.) |
