Претходен број

Најголемиот фармер во Штипско соочен со казна од 30.000 евра

Поднесените кривични пријави поради узурпација на државно земјиште

Иван Бојаџиски

ШТИП - Казна од најмалку 30.000 евра му се заканува на Стојанче Миланов, најголемиот и најпознат фармер во Штипско, во јавноста попознат под прекарот Столе Сиромао. Од Подрачната единица при Министерството за земјоделство информираат дека поднеле кривични пријави против три правни лица за узурпација на државно обработливо земјиште. Иако во оваа институција не откриваат имиња, се знае дека највисоката казна му се заканува на најголемиот фармер.

Во Подрачната единица велат дека правните субјекти добиле кривична пријава затоа што наспроти предупредувањата, продолжиле да обработуваат државно земјиште. Имено, пред десетина години земјиштето го добиле под концесија, но договорот по оваа основа им истекол уште пред три години.

„Концесиските договори се изминати, а тие продолжија да ја обработуваат земјата во државна сопственост која ја добиле или треба да ја добијат нови концесионери. Едно од правните лица незаконски обработува 540 хектари, второто - 300, а третото - 180 хектари плодно земјиште. Навреме ги предупредивме и побаравме веднаш да ги ослободат нивите. Но, тие се оглушија и продолжија со узурпација поради што заработија кривични пријави“, вели Ацо Рамбабов, началник на оваа подрачна единица во Штип.

Рамбабов укажува дека енормно високите казни произлегуваат од висината на штетата која била направена низ годините на нелегалното користење на земјиштето од страна на правните субјекти. „Неодговорните земјоделци продолжија да ги подготвуваат нивите за есенската сеидба. За да не бидат откриени, земјиштето го работат ноќе. Нивната надеж дека тоа нема да го видиме се изјалови. Во Подрачната единица формиравме контролни екипи. Узурпаторите ги фативме на самото место во нелегалниот бизнис со земјата. Основниот суд во Штип до крајот на годинава треба да одлучи дали казните што ги бараме како обесштетување ќе бидат изречени на узурпаторите. Процената ја дадовме на судот. Точно е дека највисоката казна што ја бараме е 30.000 евра“, потенцира Рамбабов.

Во штипската општина има 4.700 хектари слободно државно обработливо земјиште подготвено за распределба на заинтересираните земјоделци. Моментно трае конкурсот за распределба на 360 хектари во атарот на селата Долни и Горни Балван и 120 хектари во лакавичкото подрачје. На новиот конкурс се јавиле 164 лица, индивидуални земјоделци и правни субјекти со исправна документација. Регистриран земјоделец може да добие најмногу до десет хектари државно земјиште под концесија.

Оние што сакаат да живеат од земјоделство, според Рамбабов, покажаа голема доза на инвентивност. Во поголем дел семејства кои бараат егзистенција преку работа на нивите се досетиле и како земјоделци регистрирале повеќе свои членови. На тој начин некои семејства под концесија добиле од дваесет до педесет хектари обработливо земјиште.

Инаку, Стојанче Миланов стана позната личност кога пред пет години ги повика граѓаните на Македонија од неговите ниви кај Долни Балван да си соберат бостан колку што сакаат. Две години подоцна, тој сам однесе неколку камиони со храна за животните на Зоолошката градина во Скопје откако во печатот прочитал дека таму се соочувале со недостиг од храна. И за овој случај сакавме да го слушнеме ставот на Столе Сиромао, но тој не беше во селото.