На „Македонија“ протести, на „Бихаќска“ контра

На младите протестанти, кои бараат расветлување на убиството на Нешкоски, во понеделникот им се приклучи уште една група

Бојан Шашевски

На младите протестантите, кои повеќе од две недели блокираат улици, праќаат претставки со барања до институциите, потпишуваат петиции против полициската бруталност и бараат правда и расветлување на убиството на Мартин Нешкоски, во понеделникот пред Спомен-куќата на Мајка Тереза паралелно им се приклучи уште една група. Нови демонстранти со нови барања. Контрапротести на легитимни протести. Иако првите упорно апелираа и потенцираа да не ги обојуваат и да не ги вмешуваат во партиските игри, завчера новата група протестираше токму поради тоа. Околу петстотини луѓе, одделно од демонстрантите, се собраа на улицата „Македонија“, па потоа се упатија да протестираат пред седиштето на опозицискиот СДСМ, за кој велат дека вмешал прсти во мирните собири. Некои од нивните пароли, флаери, но и изјави гласеа: „Стоп за политичката злоупотреба на младите и смртта на Мартин Нешкоски“, „И ова ли е дел од Надеж?“, „До кога ќе не' манипулирате?“.

Новоформираната група преку коловозите на „Македонија“ и „Мито Хаџивасилев-Јасмин“ се упати на дестинацијата кон „Бихаќска“. На скопските улици завчера се прелеаја повеќе контрапротестанти отколку демонстранти. За разлика од протестантите на кои не им беше дозволено да ја преминат раскрсницата меѓу улиците „Железничка“ и „Бихаќска“ кај надвозникот за Кисела Вода, во понеделникот обрачот од полицајци воопшто не постоеше. Ја снема барикадата што две недели спречуваше пристап до МВР. Сега десетина униформирани лица стоеја на четириесетина метри од рампата на штабот на СДСМ. Насобраната група дојде до нив, седна за момент на цементот од „Бихаќска“, дозволи камерите да ги снимат натписите и си замина.

Од седиштето на опозиционерите излезе претседателот на СДММ, Дарко Давитковски, и пред медиумите ги обвини ДПМНЕ и УМС дека бесрамно уфрлаат сопствени послушници за да ги растурат протестите на младите што го кренаа гласот и не дозволија нивната неправда и злосторството да помине. „Кога видовте дека ништо не ви успева, преминавте на вашиот проверен тоталитарен метод: лажно обвини друг, направи уште поголеми поделби и обиди се да ги продадеш како единствена вистина. Денес ќе се обидете да ги соберете своите послушници и повторно да организирате контрапротести затоа што сакате со уште една злоупотреба на младите да ја излажете јавноста, која одамна ги има прочитано вашите методи“, рече Давитковски.

Од владејачкиот табор веднаш реагираа и соопштија дека со самото тоа што Давитковски дал изјава во која открил детали и сликовито опишал како течеле протестите зад сцената е доволен доказ дека СДСМ стои зад организацијата на овие протести. „Не само што СДСМ брутално ја злоупотреби оваа трагедија туку и прави политички маркетинг. Ова е врвот на нечовечно и неодговорно однесување на СДСМ. СДСМ со Бранко Црвенковски е спремен на се', па дури и политички да злоупотреби една ваква трагедија“, стои во реакцијата на ВМРО-ДММНЕ.

Додека контрапротестантите ја одеа договорената рута и партиите се обвинуваа едни против други, останатата група демонстранти, како и секоја изминат ден, се насобра во 18 часот на збирното место зад Спомен-куќата на Мајка Тереза.

„Ве молам, немојте да подлегнувате на никакви провокации бидејќи од насобраната група се пратени овде да го направат токму тоа“, беше една од пораките на протестантите. Некои од нив посочија дека ова е само обид да се сврти вниманието од вистинските проблеми и да се маргинализираат нивните барањата, други велат дека секој има право да изрази некакво незадоволство преку мирни протести, а трети сметаат дека контрапротестантите се уште еден класичен напад врз слободната волја на граѓаните. Тие својот собир потоа го искористија јавно да дискутираат за новите активности и да даваат идеи околу соодветните државни органи, кои би ги разгледале и реализирале потписите од петицијата. Вчерашниот, најдолгиот ден во годината го искористија повторно да маршираат по улиците и да бараат одговори од надлежните институции.