„Топлификација“ ќе поставува калориметри на сметка на граѓаните

Инвестицијата за секое домаќинство ќе изнесува
околу 200 евра

Снежана Калабакова


И покрај најавата што лани ја дадоа одговорните од АД „Топлификација“ дека оваа грејна сезона потрошувачите ќе добијат калориметри на радијаторите, се чини вакви уреди во домовите ќе имаат само оние кои ќе платат за тоа. Инвестицијата за секое домаќинство ќе изнесува околу 200 евра, но од „Топлификација“ велат дека граѓаните ќе можат да платат на десет-дванаесет рати. Од друга страна, пак, потенцираат дека планот е прецизен и годинава ќе бидат покриени само по пет отсто од потрошувачите на одделните топлани.

Според одговорните во претпријатието, вградувањето на таканаречените распределители било голема работа во физички обем, за што е потребно многу време, кое тие го изгубиле летово околу постапката со враќањето на лиценцата за снабдување и дистрибуција на топлинска енергија. Но, објаснуваат дека не е пречка распределителите да се монтираат и по почетокот на грејната сезона. „Топлификација“ ќе инвестира во мобилните читачи и во софтверот за отчитување на податоците. Претпријатието деновиве е во интензивни преговори со фирми-изведувачи, како што се германската „Техем“, данската „Буцнати“ и англиска фирма, а онаа што ќе им понуди најповолна цена ќе им ја испорача опремата.

Севкупниот процес на инсталирање на софистицираната опрема, односно на базните станици во станбените згради до кои ќе доаѓа радиосигналот со податоците од распределителите треба да заврши до 10 октомври. Веднаш потоа куќните совети ќе добијат понуди за вградување на уредите, кои поради спецификата на системот ќе се монтираат по принципот сите станари во еден објект или никој. Со распределителите на радијаторите во станот, потрошувачите ќе имаат избор да штедат и да загреваат толку простории колку што ќе сакаат и ќе имаат потреба.

„Годинава експериментално со по пет отсто од конзумот во секоја општина влегуваме во проектот за поставување на распределителите. Доколку ’Топлификација“ инвестира во севкупниот проект, за што законски не е обврзана, би требало да вложи околу осум милиони евра, што е преголема инвестиција, бидејќи севкупниот приход на претпријатието на годишно ниво изнесува 23 милиони евра. Ние имаме 50 илјади корисници и би требало да се монтираат 250 илјади распределители, а ’Топлификација‘ нема интерес да вложи толку многу пари“, вели Методија Стојчев, извршен директор во АД „Топлификација“.

Од претпријатието објаснуваат дека поставувањето на уредите од нив го бара Регулаторната комисија за енергетика и тоа е услов што го пропишува лиценцата за снабдување со топлинска енергија.