Хроника

Кавадарци завиено во црно по трагедијата кај Удово

Мајка и ќерка, брачни сопружници и градежен работник загинаа во стравотниот судир

УДОВО, КАВАДАРЦИ - Стравотната сообраќајна несреќа што се случи завчера попладне на магистралниот пат Демир Капија - Удово, во која загинаа пет лица, ја растажи Македонија. Семејствата се завиени во црно, а трагите од силниот удар и вчера стоеја на патот кај селото Удово како потсетник на страшната судбина.

Несреќата се случи околу 16,30 часот при директен судир меѓу камион марка ТАМ со скопски регистерски таблички, сопственост на фирмата „Зоагенс“, и автомобил „фиат уно“ со велешки регистарски ознаки. Судирот беше кобен за четворицата патници во автомобилот, како и за еден совозач во камионот. Повредени се уште петмина сопатници во камионот, кој пренесувал градежни работници. На самото место, животот го загубија ваташанката Јадранка Арнаудова (48), која го управувала „фиатот“, нејзината мајка Зора Таскова (70) и брачната двојка од Кавадарци Диме (50) и Данче (47) Јосифови. Судирот беше кобен и за совозачот во камионот Ѓоко Маринковиќ (46) од скопското село Горњани. Во несреќата се повредени возачот на камионот Зоран С. (40) од Скопје и уште четворица негови сопатници. Сите повредени, по укажаната лекарска помош во болницата во Неготино, се пренесени на лекување во Клиничкиот центар во Скопје и се надвор од животна опасност.

Причините што го предизвикале директниот судир меѓу камионот и автомобилот се' уште не се познати.

Првичните информации говорат дека до несреќата дошло поради недржење страна на движење. Автомобилот „фиат уно“ од засега непознати причини преминал на спротивната лента и удрил директно во камионот.

Глетката на местото на несреќата беше страшна. Од силината на ударот предниот дел на автомобилот речиси го немаше, а камионот завршил во бездната покрај патот. Насекаде имаше расфрлано остатоци од двете возила, а еден труп зад камионот на патот укажуваше за оваа голема трагедија. Поради несреќата и вршењето увид од страна на истражните органи, сообраќајот на делницата Демир Капија - Удово беше во прекин повеќе од три часа, при што се создаде колона возила на двете коловозни ленти долга десет километри.

Веста за загинувањето на четворица кавадарчани како молња се прошири низ Кавадарци. Кавадарчани се во шок и не можат да поверуваат во информацијата. Жалат за своите сограѓани Јадранка Арнаудова, правничка во автобуската станица „Сам Вел“ во Кавадарци, нејзината мајка Зора Таскова и по сопружниците д-р Данче Јосифова, поранешна директорка на Здравствен дом - Кавадарци и Диме Јосифов. Според она што може да се слушне од роднини на загинатите, четворицата тргнале кон Негорски Бањи каде што требало да остане на лекување Зора Таскова.

Сопружниците Јосифови зад себе оставија два сина-близнаци кои минатата година дипломираа, а Арнаудова две п��лнолетни ќерки. Кавадарчани коментираат дека Арнаудова била возач со долгогодишно искуство и се прашуваат која е вистинската причина што нејзиниот автомобил преминал на спротивната лента.

Вчера на гробиштата во село Ваташа беа погребани Јадранка Арнаудова и нејзината мајка Зора Таскова. Погребот на Јосифови ќе биде дополнително закажан, бидејќи се чекаат да се вратат од Италија мајката на Данче и нејзината сестра. Тие на денот на несреќата пристигнале во Италија. Мајката на Данче заминала на гости кај својата друга ќерка.

За нецел месец на делницата Демир Капија - Удово загинаа вкупно седум лица. Минатиот месец во сообраќајна несреќа изгореа мајка и ќерка од Нови Сад. (Е.П.-А.Д.)