Гадафи од ОН ќе бара поделба на Швајцарија

ЊУЈОРК - Според швајцарската министерка Криста Марквалдер, кога Гадафи ќе го посети Њујорк на 23 септември има намера да побара од ОН да се подели Швајцарија и нејзината територија да биде поделена меѓу соседна Франција, Германија и Италија. Во Повелбата на ОН посебно е нагласено дека ниту една земја-членка не може да го загрозува суверенитетот на друга, па затоа барањето веројатно нема да дојде далеку. Но, тоа е уште еден знак за напнатоста што ќе биде забележана при посетата на ексцентричниот диктатор.

Либиско-швајцарското нарушување на односите почна пред една година, кога најмладиот син на Гадафи, Ханибал, беше уапсен во хотел во Женева, бидејќи претепал двајца вработени со ремен и закачалка. Претходно тој имал расправии со полицијата во Франција и во Италија, а во еден случај бил притворен и поради возење под дејство на алкохол на „Шанзелизе“ во Париз, со брзина од 90 км на час во погрешна насока.

Либија возврати налутено, отповикувајќи некои дипломати и повлекувајќи пет милијарди долари од швајцарските банки, затворајќи го претставништвото на „Нестле“ во Триполи и заканувајќи се дека ќе ги прекине испораките на нафта.

За една година тоа прашање се влоши. Пред две седмици претседателот на Швајцарија, Ханс-Лудолф Мерц, отпатува во Триполи за да се извини за апсењето, а Либија рече оти ќе дозволи заложниците да заминат до 1 септември. Сепак, тие се' уште не се ослободени.