КУНДУЗ - Силите на НАТО спроведуваат истрага дали убиле голем број авганистански цивили во вчерашниот извршен напад врз два киднапирани танкера со гориво, при што беше предизвикана голема експлозија. Инцидентот во северната провинција Кундуз би можел да поттикне гнев против странските војници само по два месеца откако новиот командант на американските и на авганистанските сили во земјата најави мерки за намалување на цивилните жртви, за кои вели дека ги поткопуваат воените напори. Капетанот на корвета, Кристин Сајденстрикер, офицерката за односи со медиумите на американските и на меѓународните безбедносни сили за помош (ИСАФ), предводени од НАТО, изјави дека авганистанските власти пријавиле оти два танкера со гориво се киднапирани, а воздушните летала на НАТО ги забележале покрај една река. „По надгледувањето дека во таа област има само бунтовници, локалниот командант на ИСАФ нареди воздушни напади во кои беа уништени танкерите со гориво и беа убиени голем број бунтовници. Нападот беше против бунтовниците. Убедени сме дека беа убиени бунтовници. Но, целосно спроведуваме истрага за информациите за цивилни жртви“, рече таа.

На прашањето како пилотите би можеле да знаат дали меѓу лицата собрани околу танкерите имало цивили или борци, таа рече: „Врз основа на информациите на местото на настанот командантите сметале дека тие се бунтовници“. Гувернерот на провинцијата Кундуз, Мухамед Омар, јави дека се стравува оти загинале 90 лица, кои биле живи изгорени во големата експлозија. „Мојот брат беше запален кога авионите ги бомбардираа танкерите со гориво. Не знам дали е мртов или жив“, рече расплаканиот селанец Гулам Јахја, меѓу десетици роднини кои се собраа пред централната болница во Кундуз, во провинцискиот главен град. Инцидентот, исто така, укажува на се' поголема несигурност во северниот дел на земјата, област која се смета за безбедна, но каде што талибанските напади се се' почести. (Ројтерс)