Кризата може да создаде изгубена генерација

Бројот на невработени млади лица на возраст меѓу 15 и 24 години во светот се искачи на највисоко ниво од Втората светска војна наваму, соопшти Меѓународната организација за труд, МОТ. Само во моментов во светот има повеќе од 81 милион млади луѓе без работа. Според последната студија на Светската организација за труд објавена во Женева, стапката на невработеност кај лицата меѓу 15 и 24 години го достигна највисокото ниво досега и се заканува да порасне во текот на годината. Таа во 2007 година изнесувала 11,9 проценти, но како последица на светската финансиска криза рапидно се зголемила и оваа година се верува дека ќе се искачи на 13,1 процент. Овој тренд ќе продолжи и во 2011 година и покрај очекуваното закрепнување на светската економија.

„Младите се моторот за економскиот развој“, изјави директорот на мот, Хуан Сомавија. „Откажувањето од ваков потенцијал е економска загуба што го загрозува социјалниот мир. Ова се заканува да создаде една ’изгубена генерација‘, која повеќе не стои на располагање на пазарот на труд и која изгубила секаква надеж да се најде вработување за да се обезбеди егзистенција“, предупреди Сомавија.

Исто така, ова претставува закана овие млади луѓе да се чувствуваат некорисни, што води кон повеќе криминал, психолошки проблеми, насилство, конфликти и зголемена злоупотреба на дроги, предупредува студијата на МОТ.

На младите им е потребно вработување. Најтешко се погодени младите во земјите во развој , пред се', во Северна Африка и на Среден Исток. Но, и во 27 земји-членки на ЕУ и во САД, како и во поранешните комунистички земји надвор од Унијата, исчезнаа многу работни места. На крајот на 2009 година 17,7 проценти од сите работоспособни млади луѓе во најважните индустриски земји биле без работа, што е досега незабележана стапка. Во споредба со 2008 година таа пораснала за 4,6 проценти. Од 2007 година наваму на светскиот пазар на труд има нови 7,8 проценти млади луѓе без работа. Половина од нив потекнуваат од Јужна, Источна и од Средна Европа. Особено се погодени земјите како што се Естонија, Летонија или Литванија, но и Шпанија.

Со оглед на драматичната состојба, МОТ упати апел до владите на државите низ светот да не преземаат мерки за кратење на програмите за вработување на младите луѓе и покрај неопходноста за штедење. (Дојче веле)