Економското закрепнување ќе оди забавено

Гувернерот на британската централна банка Bank of bank of England, Марвин Кинг, изјави дека закрепнувањето на економијата во земјата и порастот на производството ќе се движат побавно од очекувањата и од поранешните предвидувања. Тој, исто така, призна дека инфлацијата годинава не ќе може да се сведе на планираните два отсто и оти тоа ниво ќе може да се достигне дури пред крајот на 2011 година.

Гувернерот Кинг објасни дека на одржувањето на високата инфлација ќе влијае зголемувањето на данокот на додадена вредност што владата го најави како една од мерките за совладување на големиот буџетски дефицит во земјата.

Признанието на гувернерот открива дека прогнозите за закрепнување на економијата за оваа година биле премногу оптимистички и нереални. Тие доаѓаат по откривањето на податоците за големиот пад на продажбата на стока за широка потрошувачка во текот на јули и за првото намалување на цените на становите и на куќите по период од една година. Тоа ги наведе експертите во финансискиот центар Сити да предвидуваат втор круг на економската криза и враќање на рецесијата во Велика Британија.

Податокот дека продолжува да се намалува бројот на невработените, кој сега изнесува 2,5 милиони луѓе, не зборува многу за стабилизацијата и за закрепнувањето на домашната економија, објаснуваат овие експерти. (МИА)