Наградата „13 Ноември“ во рацете на Николовски, Арсовски и на Илиевска

Бронзениот од светското првенство во Белград каратистот Жарко Арсовски, потоа седмиот од светското првенство во кајак во Словенија Атанас Николовски, како и каратистката Наташа Илиевска, втора на светската ранг листа за 2010 година, се добитници на наградата „13 Ноември“ во категорија спортисти, што ја доделува Сојузот на спортови на Скопје во соработка со градот .

Во категорија на спортисти со посебни достигнувања наградени се Игор Димовски, кој го преплива Ла Манш и шестиот на светската ранг-листа во маратонск�� пливање за 2010 година, Евгениј По Ацев.

Сојузот на спортови во категоријата тренери признание им врачи на кајакарскиот стручњак Ѓокица Николовски и на карате учителот Бошко Заборски.

Ефтим Угроновски, Аница Пупиновска, Петар Митров и Михајло Трајковски се спортските работници наградени за животно дело.

За огромен придонес во спортот „13 ноемвриската“ награда отиде во рацете на Љубомир Котевски, основачот на планинарскиот клуб „Кораб“ и еден од најуспешните во државава во таканаречениот „спорт за сите“.

Во ова категорија наградени се и спортскиот директор на „Скопскиот маратон“ Кире Синадиновски, претседателот на фудбалскиот клуб Металург, Александар Панов, претседателот на кугларскиот клуб Мекпетрол, претседателот на организацискиот одбор на Светскиот куп во куглање Александар Бичиклиски, потоа Александар Коцевски од пливачкиот клуб „Бардар“ и Војо Настевски, претседател на Боксерската федерација за организација на „Златен Гонг“.

Признание за својата успешна работа добија и професорите по физичко воспитување Амди Муса (ОУ „Владо Тасевски“) и Анета Глигорова („Орце Николов“). Награда за својата добра работа доби и женскиот ракомет клуб Металург, а во категоријата Здружение наградена е навивачката група „Комити“.