Аронјан се издвои на меморијалот „Таљ“

Првиот носител Левон Аронјан (рејтинг 2801) е сам на врвот на табелата по првата третина од 5. Меморијал „Таљ“, шаховски супертурнир од 21. категорија во Москва. Во третото коло на турнирот, кој се игра од 4 до 14 ноември во чест на осмиот светски шампион, Ерменецот го доби Антимеранскиот гамбит против Борис Гелфанд (2741) од Израел.

Цел поен во третиот круг освоија и Владимир Крамник (2791) и Шахријар Мамедјаров (2763), обајцата со црни фигури. Русинот славеше во Нимцо-индиска одбрана со 4. Дц2 против сонародникот Павел Елјанов (2742), а Азербејџанецот беше подобар во 71. потег во Шпанската одбрана, варијанта на Бреер, против Алексеј Широв (2735) од Шпанија. Ремизираа Сергеј Карјакин (2760) со Хикару Накамура (2741) и Александар Гришчук (2771) со Ванг Хао (2727).

Табела: Аронјан 2,5 поени, Карјакин, Ванг Хао, Мамедјаров, Накамура и Гришчук по 2, Крамник 1,5, Гелфанд 1, Елјанов и Широв без поени.

Аронјан - Гелфанд

1. д4 д5 2. ц4 ц6 3. Сф3 Сф6 4. Сц3 е6 5. Дд3 Сбд7 6. г3 Лд6 7. Лг2 О-О 8. О-О д:ц4 9. Д:ц4 е5 10. Тд1 Де7 11. Лг5 х6 12. Сх4 Сб6 13. Л:ф6 Д:ф6 14. Дб3 Лц7 15. д5 ц:д5 16. Л:д5 Кх8 17. Тац1 Де7 18. Дц2 Тб8 19. а4 Лх3 20. Лг2 Ле6 21. а5 Са8 22. Сд5 Л:д5 23. Т:д5 Де6 24. б4 Лд8 25. Сф5 г6 26. Сд6 Сц7 27. Тдд1 б6 28. Сб7 Са6 29. Тд6 Дг4 30. Дб2 Д:б4 31. Д:е5+ Кх7 32. Тд7 Лг5 33. Тцд1 Сц5 34. С:ц5 Д:ц5 35. Д:ц5 б:ц5 36. Т:а7 ц4 37. а6 ц3 38. Тц7 Тбц8 39. Т:ц8 Т:ц8 40. е3 Ле7 41. Тц1 1-0