Во употреба надземниот премин на Бит-пазар

Надземниот премин на Бит-пазар, иако се' уште не е официјално завршен, граѓаните веќе го користат. Тој ќе биде единствено место каде што пешаците ќе можат да минуваат за да дојдат од едната страна на пазарот до другата, бидејќи досегашниот пешачки премин се затвора со жардиниера. Таа е продолжение на постојното средишно зеленило до градскиот часовник и ќе се спои со она пред Здравствениот дом „Бит-пазар“. Планирано е во неа да се засадат дрвја и високорастечко зеленило. За да се спречи преминувањето преку жардиниерата, најверојатно, на средината ќе биде поставена и висока булеварска ограда.

Во моментов на надземниот премин се' уште се работат некои ситни градежни и занаетчиски завршни зафати. Од Општината Чаир не најавуваат свечено предавање во употреба се' додека преминот не биде комплетно завршен.

„Мораме некако да го спречиме преминувањето преку жардиниериското зеленило и затоа со градоначалникот Коце Трајановски се договоривме да има и висока ограда. Од искуство знаеме колку се преминуваше преку жардиниерите пред ’26 Јули‘ и се газеше по вегетацијата, па затоа нема да дозволиме тоа да ни се повтори“, вели Изет Меџити, градоначалникот на Чаир.

На надземниот премин веќе се монтирани лифтовите, а сега треба да се провери како функционираат и официјално технички да се предадат во употреба пред да почнат да ги користат граѓаните. (Сн.К.)