Умирање за време на викендите
МариЈа Остоева, Скопје
Ниту случајно немојте да бидете болни, особено тешко болни, кога редовната терапија не ви помага во сабота или недела. Па, викенд е. Каде се видело да се работи? Брза помош и Домашна посета (на ниво на град) се активни (знаеме сите колку се) само од понеделник до петок, кога се сите екипи на место. А, преку викенд, веројатно одмораат!? Зошто? Не ми е познато, бидејќи, имам информација дека има екипи кои дежураат (во Брза помош) по 12 часа.
Во минатата саботата наутро се јавив во Брза помош, бидејќи мајка ми имаше големи болки (таа има тежок артритис, има вештачки колк, има операција на другата нога со плочка, има болни бубрези) и претпоставував дека нашите стручни медицински лица ќе и' дадат инекција. Но, од Брза помош ме упатија на Домашна посета, бидејќи тие немале доволно екипи, а оделе само на повик на карцином и срцеви болни. Во Домашна посета истата приказна - откако ме испитаа што се' сум и' дала, како на првоодделенче ми објаснија дека немаат доволно екипи за да дојдат и дека и тие одат само на повици од тешко болни од карцином. Тешко тие луѓе ако имаат проблеми преку викенд. Па, и обичен ден. Ми се случило, додека татко ми беше жив, да повикам Брза помош и да ми кажат сами да го симнеме болниот до возилото. Ајде и го направивме тоа. А, тие наместо како итен случај да го внесат во дежурната амбуланта на Кардиологија, го оставиле пред врата, а докторката и сестрата си влегле внатре. Среќа дојдов, му кажав на дежурниот лекар дека има тешко болен пред врата и работата се заврши - беше укажана потребната помош. А, докторот од Кардиологија не можеше да знае кого има пред врата?!
|
