Газдата заклучил потстанарка поради неплатена кирија
БИТОЛА – Педесет и деветгодишен битолчанец ја киднапирал својата потстанарка речиси два дена бидејќи не му ја плаќала киријата.
Полицијата го осомничи Ристо Радивчев за противправно лишување од слобода на својата потстанарка Соња Поповска (45). За соизвршителство полицијата ги товари и Благој П. (38), управител на Агенцијата за професионално обезбедување „Гарда“ од Битола.
Според полицијата, на 25 мај во куќата на Радивчев на улицата „Солунска“ број 292, по барање на газдата обезбедувањето од „Гарда“, со кои претходно склучил договор за соработка, побарал да му ја сменат бравата од влезната врата на оградата од куќата. Со ваквата постапка кираџиката, која подолго време не ги платила сметките за режија, останала заробена во куќата од 10,45 во неделата до 17, 20 во понеделникот. (А.Б.) |
