Србија рутински ја мина Аргентина

Машката одбојкарска репрезентација на Србија со победа влезе во третата рунда на Светското првенство во Италија. Најдобрите одбојкари на нашиот северен сосед без проблеми ја совладаа Аргентина со 3:1 (по сетови: 25:15, 21:25, 25:22, 25:18) и за пласман во полуфиналето ги дели уште триумф над Русија.

Очекувано, младата селекција на Аргентина не можеше против Србите. Србија ја потврди победата за час и половина. Беше предводена од Иван Миљковиќ кој забележа 20 поени, главни адути на Јужноамериканците беа Конте со 16 поени и Переира со 13, недоволно за ништо повеќе од чесен пораз.

Бразил и Чешка го одиграа единствениот дуел во пет сета на стартот на третата рунда. На крајот славеа „кариоките“ со 3:2 (25:20, 22:25, 23:25, 25:21, 15:8). Бразилците се обидоа веднаш да им покажат мускули на Чесите, но од другата страна на мрежата го имаа Петер Платеник кој брилираше и во фазата на одбрана и во нападот и долго време го одржуваше својот тим во чекор со противничкиот. Дури по вториот технички тајм-аут Бразил успеа да се одлепи, најмногу благодарение на добриот прием на Ендреш. Звезда во вториот сет беше Чехот Ондреј Худечек. Пет пати успеа да мине во напад и да ги изненади Бразилците, додека и останатите негови колеги беа на ниво, одржуваа израмнет ритам во играта за израмнување на 1:1. Чесите продолжија во исто темпо и во наредниот што на крајот им припадна со 25:23 за водство со 2:1. Бразилците се разбудија дури во четвртиот период, го подигнаа нивото на игра во одбрана и во смечевите посебно се истакнаа Тео Фабрисио, Ендреш и Амарал. Во петтиот сет до израз дојде агресивноста на фаворит во мечот, Бразил, како и стоотстотниот ефект на Амарал во нападот.

Во останатите два меча Бугарија ја порази Шпанија со 3:1 (25:21, 27:25, 26:28, 25:18), а САД со максимални 3:0 го доби дуелот со Франција (по сетови: 25:16, 25:14, 25:23).

Резултати од мечевите во третата рунда на Светско првенство во одбојка за мажи во Италија:

Група О: Франција - САД 0:3 (16:25, 14:25, 23:25)

Група П: Србија - Аргентина 3:1 (25:15, 21:25, 25:22, 25:18)

Група Р: Бразил - Чешка 3:2 (25:20, 22:25, 23:25, 25:21, 15:8)

Група К: Шпанија - Бугарија 1:3 (21:25, 25:27, 28:26, 18:25)