ЕИБ делумно ќе ја финансира гасификацијата

ЕИБ ќе финансира дел од проектот за гасификација на Македонија, патниот правец Демир Капија – Смоквица, железничката пруга кон Бугарија, втората и третата фаза од хидросистемот „Злетовица“, во обновливи извори на енергија, а договорено е да се направи и надополнување на кредитната линија од 100 милиони евра наменета за мали и за средни претпријатија, одобрена минатата година за подобрување на ликвидноста претпријатијата поради светската економска криза. Ова вчера го најавија вицепремиерот и министер за финансии, Зоран Ставрески, и потпретседателот на ЕИБ, Дарио Сканапиеко, по средбата во Скопје.

„ЕИБ нема горна линија за висината на средствата што би ги одобриле, но ако проектите се добри, ќе ги финансираме“, рече Сканапиеко.

Тој изрази задоволство од финансиската дисциплина на земјата во време на криза, како и капацитетот да размислува на долгорочни цели во време на криза, како и од реализацијата на кредитната линија од 100 милиони евра и рече дека поддршката на мали и на средни претпријатија како стожер на економијата и создавачи на нови работни места ќе продолжи.

Ставрески се заблагодари што ЕИБ во овие две години на Македонија и' даде поддршка со 150 милиони евра во два проекта и додаде дека постои заемна желба за интензивирање на соработката.