Вардар се фузира со Миравци за да остане во Прва лига?
Големо разочарување меѓу играчите и навивачите во Миравци по пласирањето на оваа информација
Миодраг Мицковиќ
Шок и неверување, односно големо разочарување меѓу навивачите и играчите на новиот прволигаш ФК Миравци од истоименото село. Преку ноќ радоста ја замени тагата и прашањето - зарем и тоа може да се случи, нивниот миленик наеднаш да згасне само затоа Вардар да остане прволигаш. Едно од најфудбалските села во Македонија, со сопствен прекрасен терен, еден од најубавите во земјава, со трибини за 1.500 гледачи, со уште едно, исто така, убаво игралиште што го има изградено Агенцијата за млади и спорт сега треба да останат празни, како што велат жителите на Миравци. И се прашуваат: каде беа досега оние што сега сакаат да го спасуваат Вардар и тоа на ваков скандалозен начин, зошто молчеа кога можеа многу порано и побезболно да му помогнат на Вардар и финансиски и кадровски, особено затоа што сигурно имаат значително поголеми можности од едно село во јужниот дел на Македонија каде што со години се создаваше тим за прва лига, во што на крај и се успеа.
„Мојот мобилен телефон е постојано активен уште од раните утрински часови“, беа зборовите на претседателот на клубот и главен спонзор на ФК Миравци, Васе Штерјов. „Сите исто ме прашуваат: Зар повеќе нема да постои Миравци, зар сега треба да одиме во Скопје и да ги гледаме нашите миленици, за кои, за повеќето, сигурно ќе нема место во новиот состав на Вардар, доколку се случи таа фузија. Што да им одговорам? Јас сам не можам да одлучам ниту сакам да одлучам. И веднаш да кажам, јас сум против оваа фузија, овој клуб не е само мое дело, туку на сите во селото, на целиот овој јужен крај на Македонија. Зар толку се мачевме четири години за да станеме прволигаши. Тврдам, имавме најсилен тим во Втора лига, со овие млади фудбалери што четири-пет години играат заедно, сигурно, ќе бевме бум во Првата лига. Силата на нашиот тим ја почувствува и Работнички кога годинава го победивме во Купот со 1:0. И сето она што го создававме со години сега може да се растури преку ноќ“, објасни Штерјов.
„Јас знам дека Скопје има интерес Вардар да биде прволигаш, но не на ваков начин со ваква фузија. Впрочем, и Миравци заслужува да игра во Прва лига, бидејќи го претставува овој дел на Македонија каде што има повеќе од 100.000 жители, односно тука не е само Миравци, тука и навивачите од Валандово, Гевгелија, Дојран, Богданци, Стојаково, Демир Капија, дури и од Неготино доаѓаа да ги гледаат натпреварите на Миравци. Зошто сега забавата и радоста да им се скратат на многубројните љубители на фудбалот. Ние сме мал клуб, признавам, но со големо срце, клуб на сите земјоделци, на сите оние вредни луѓе во овој дел од Македонија.
Признавам, дека имам големи притисоци да извршиме фузија со Вардар, но ќе повторам. Зар само во Скопје треба да се игра фудбал? Скопје и Тетово во моментов имаат три прволигаши, па нека се направи скопска лига зашто сме им потребни ние, мал клуб“, ни рече на крај разочараниот претседател Васко Штерјов.
На крај разговаравме и со тренерот Ѕвонко Бучков, кој беше заедно со играчите, бидејќи требаше да почнат подготовките за новата сезона.
„Завчера игравме во првото коло за Купот на Македонија во јужниот регион и го победивме Кожув со 8:0. Што да им кажам на играчите, како да ги натерам да тренираат и да ги почнат подготовките за новата сезона по ова што го слушнаа за фузијата со Вардар, свесни дека може да се случи Првата лига за нив ќе биде само убав сон, бидејќи и ним им е јасно оти тешко ќе можат да обезбедат место во новиот тим што ќе се прави со фузија затоа што веќе се најавени многу звучни имиња што треба да го засилат Вардар“, вели Штерјов. |
