Буш не му е лут на новинарот што го гаѓаше со чевли
Американскиот претседател „не му се лути“ на ирачкиот новинар кој ги фрли чевлите кон него, соопштија од Белата куќа. Мунтадар ал Заиди ги фрли чевлите кон Џорџ Буш за време на конференцијата за печат што се одржа во Багдад, притоа нарекувајќи го куче. Буш во тој инцидент помина без повреди, но неговата портпаролка Дејна Перино доби модро око во мешаницата што се случи потоа.
Заиди во вторникот се појави пред истражен судија и „го призна делото што го направил“, изјави портпаролот на Високиот судски совет. Ирачката армија претходно ги негираше тврдењата од братот на Заиди дека новинарот бил тепан додека бил во притвор. Телевизискиот новинар, наводно, по инцидентот се здобил со скрешница на раката, на неколку ребра и внатрешно крвавење, изјави неговиот постар брат Даргам. Заиди беше вратен во притвор додека судијата не го преиспита случајот како дел од комплицираната правна процедура што би можела да трае со месеци пред можниот судски процес. (Би-Би-Си)
|
