Градоначалникот ќе го менува името на општина Карбинци во Баргала
Првиот човек на Карбинци, Васил Богдански (десно), засега негира дека промената е негова иницијатива
Иван Бојаџиски
ШТИП - Малата општина Карбинци, која има 4.012 жители, е пред големо искушение. Наскоро граѓаните би можеле да се изјаснуваат за промена на вековното име. Предлогот е Општината да го добие името - Баргала, поради истоимениот ранохристијански град лоциран на тоа подрачје, а во кој имало континуиран живот од првиот век.
Жителите на малата општина се во голема недоумица. Тие не знаат од кого потекнал предлогот за промена на името на општината. Според упатени во приликите и состојбите во сиромашната општина, предлогот бил на актуелниот градоначалник Васил Богдански. Тој најмногу се прослави со печењето вол од илјада килограми во чест на победата на последните локални избори.
„Слушнав за таква идеја, ама таа не е од мене туку, барем како што јас дознав, тоа е предлог на група граѓани. Ако предлогот дојде во локалната власт, ќе биде поставен на разгледување пред Советот на Општината“, изјави Богдански.
Од вработени во локалната самоуправа ни беше потврдено дека предлогот е на градоначалникот, со поддршка изразена преку потписи од група членови на ВМРО-ДПМНЕ. Писмениот предлог ќе се нашол на првата наредна седница на Советот на Карбинци, која ќе се одржала во втората половина од годинава.
Во писмениот предлог од кој градоначалникот како негов идеолог засега се откажува, стоело дека е време Општината да го остави во минатото своето сегашно име, бидејќи тоа било турско и симбол на петвековното владеење на Турците во Македонија. За иницијаторите на предлогот се работело за нешто што многу порано требало да биде променето, ама сега се стекнале услови.
Сепак, во Општина Карбинци се сомневаат во успешниот исход на собраниската седница. Имено, целата оваа конструкција за промена на името овде се смета за вмровска идеја зад која се криела намерата се' што било повеќе да не биде, барем кога се работи за имиња на улици, институции, па дури и на самата општина. Неуспехот на оваа идеја се наоѓа во фактот дека во општинскиот Совет доминираат советниците од СДСМ кои се противат на ��акви решенија.
Инаку, во општината Карбинци дури 17 отсто од жителите, или околу 700 лица, се од турската етничка заедница. Станува збор за познатата етничка група јуруци кои живеат во селата високо на планината Плачковица, а дел и во подножјето. |
