Баерн им го укина Октоберфест на играчите

Наместо во традиционалните баварски носии да се појават на Октоберфест што е неизбежна традиција кога станува збор за Баерн Минхен, фудбалерите на германскиот првак вчера во тренерки се појавија на тренинг откако управата реши да им ја укине посетата на фестивалот на пивото.

Баерн во неделата го загуби дербито против Борусија Дортмунд со 2:0 и го забележа третиот пораз во седмиот меч од новата сезона.

Лошата позиција на табелата и само пет постигнати голови ја наведе управата на клубот на играчите и на стручниот штаб да им го забрани одењето на Октоберфест.

„Управата на Баерн реши да ја откаже планираната посета на фестивалот на фудбалерите и на стручниот штаб. Поради лошите резултати тренерот Луј ван Гал реши да закаже тренинг“, соопшти баварскиот клуб.

Во 7. коло на Бундес-лига нов шок за Штутгарт. Овојпат пораз, и тоа на домашен терен од Ајнтрахт Франкфурт со 2:1, резултат кој ги „зацврсти“ на дното на табелата. Колото со реми го затворија Баер Леверкузен и Вердер - 2:2.

Бундес-лига, 7. коло:

Штутгарт - Ајнтрахт 1:2, Борусија Д. - Баерн 2:0, Баер - Вердер 2:2. Сабота: Фрајбург - Келн 2:2, Мајнц - Хофенхајм 4:2, Мехенгладбах - Волфзбург 1:1. Нирнберг - Шалке 2:1. Петок: Хановер - Сент Паули 0:1.

Табела: Мајнц 21, Борусија Д. 18, Хановер 13, Баер 12, Фрајбург 12, Хофенхајм 11, Хамбургер 11...