Претходен број

Каде ќе плови новиот владин брод

Милошоски ја споредуваше ДУИ со терористичката Хезболах, но сега очигледно се други времиња

Соња Крамарска

Два дена по објавувањето на коалицијата меѓу ВМРО-ДПМНЕ и ДУИ, во политичките кругови во Македонија, а и во јавноста владее неочекувано затишје, иако зад сцената се одвиваат трескавични консултации и прогнози за натамошниот развој на настаните по неочекуваната вест. Двете партии, по објавувањето дека склучиле соработка, се повлекоа секоја во своите кампови да ги довршат деталите околу персоналниот состав на владата. Но, остана нејасно под кои услови е договорена коалицијата и кои се отстапките што двете страни морале да ги направат, особено во делот на мајскиот договор за кој ВМРО-ДПМНЕ тврди дека ДУИ покажала флексибилност, но за кој партијата на Али Ахмети зборува поинаку.

Не така одамна, само пред неполни две години, во скопскиот хотел „Арка“ се случи првото ракување меѓу лидерите на ВМРО-ДПМНЕ, Никола Груевски, и на ДУИ, Али Ахмети, што беше главна медиумска вест, со оглед на тоа дека двајцата шефови на партии претходно одбиваа да се сретнат. Само како илустрација, министерот за надворешни работи и висок функционер во ВМРО-ДПМНЕ, Антонио Милошоски, ја споредуваше ДУИ со терористичката организација Хезболах, а за Влатко Ѓорчев, пратеник и исто така висок функционер на ВМРО-ДПМНЕ, ДУИ беа „балисти“ кои коалицираа со „фашистите“ од СДСМ.

Но, времињата очигледно се сменија и она што некогаш за водечката десничарска партија во Македонија беше незамисливо, сега стана реалност и по помошта што ДУИ му ја даде на Груевски за да ја оствари својата намера за предвремени избори, дојде време лидерот на ВМРО-ДПМНЕ и премиер да им возврати.

Политикологот Дане Талески тоа го нарекува силен брак од интерес или чудна коалиција, како што вели, на пушки и на лавови. „На ВМРО-ДПМНЕ им требаше по секоја цена Бадинтерово мнозинство, а на ДУИ и' требаше по секоја цена влез во владата“, ја објаснува тој главната причина за коалицирање, додавајќи дека е јасно оти „во ВМРО-ДПМНЕ се несреќни и во раководството и членството поради коалицијата со ДУИ“.

„Но, има политички проблеми за кои имаат спротивставени ставови и не знам како ќе функционира тоа. Досега тие се гледаа како непријатели. Груевски за време на кампањата прати пораки што се дијаметрално спротивни од ставовите на ДУИ“, вели Талески.

Новата коалиција навистина ја очекуваат големи предизвици. На крајот на годината Македонија ќе биде оценувана дали ги исполнила критериумите за добивање датум за почнување преговори за членство во ЕУ. Економската состојба нема никакви нијанси на розово, а животниот стандард на граѓаните е најнизок во споредба со другите балкански земји кои произлегоа од некогашната југословенска федерација.

Како Дамоклов меч виси и проблемот со името со нашиот јужен сосед кој ги блокира сите процеси на надворешно-политички план за Македонија и се заканува сериозно да го смени курсот на земјава, ако веќе и не е сменет, со оглед на тврдиот став на Груевски во преговорите со Грција.

Но, прашање е дали ВМРО-ДПМНЕ и ДУИ сега разговарале за тоа или пак овие прашања ќе се најдат на маса откако бродот ќе го започне својот пат во немирното море. Останува неизвесно и што ќе прави ДУИ со нивните политички барања преточени во таканаречениот мајски договор.

Талески смета дека владата сакала-нејќела ќе мора да се занимава со политичките барања на ДУИ. „Прашање е дали ДУИ ќе се повлече од барањата. Можеби повеќе нема да ги викаат мајски договор, но сигурно ќе сакаат да ги исполнат. Ако не се залага ДУИ за нивно остварување, тогаш кој е нивниот интерес за учество во власта“, анализира тој.

Владо Бучковски, поранешен премиер од редовите на СДСМ, вчера рече дека коалицијата меѓу ВМРО-ДПМНЕ и ДУИ ќе биде, вели, експеримент за кој се надева дека ќе биде успешен. Сепак, тој им дава рок од две години соработка.

„Конзервативците и марксистите-ленинистите ќе бидат заедно во влада. Двете партии немаат искуство во заедничко коалицирање, што може да биде една од најголемите пречки. Што би рекол министерот за надворешни работи, Антонио Милошоски, Хезболах заедно со поранешните лавови ќе се обидат првпат да функционираат и тоа еден цел мандат, но моја процена е дека ќе издржат најмногу две години“, вели Бучковски.

„Оваа коалиција е почеток на крајот на популарноста на Груевски. Тој, конечно, ќе се соочи со фактот дека во држави во транзиција е неприродно политичарот да биде популарен како холивудска ѕвезда“, прогнозира поранешниот премиер и поранешен лидер на опозициските социјалдемократи.

Евроамбасадорот Ерван Фуере во првата изјава дадена по постигнатиот договор меѓу ВМРО-ДПМНЕ и ДУИ оптимистички рече дека очекува конечно да настапи позитивна политичка клима во Македонија по сите турбуленции во изминатиот период.

Според Фуере, важно е владата целосно да се ангажира во исполнување на реформите, особено на осумте криетериуми поставени од страна на ЕУ и повика извршната власт да продолжи со активностите за расчистување на сите нерегуларности и инциденти регистрирани за време на изборите.

„Важно е колку што може да се стори тоа поскоро, а очекуваме новата влада да направи соодветни измени на Изборниот законик како гаранција дека се' ќе биде во најдобар ред на локалните избори предвидени за напролет идната година“, рече Фуере.

Но, желбите се едно, а реалноста е друго. Груевски и ДУИ теоретски располагаат со фантастично големо мнозинство од 81 пратеник или 82 заедно со Фијат Цаноски. Меѓутоа, тоа не мора секогаш да значи дека работите ќе одат мазно особено затоа што на македонската политичка сцена се случи најневозможната политичка комбинација.