Премиерот не знае што подготвува Нимиц

„Нема ништ�� ново околу спорот за името. Mедијаторот Метју Нимиц е активен, имаше контакти со двете страни и идните случувања ќе зависат од него“, соопшти вчера премиерот Никола Груевски. Според него, македонската страна е постојано во комуникација со медијаторот, но дали ќе има рунда разговори или евентуално негова посета на Македонија, не може да прејудицира. „Во секој случај, тој го одржува темпото на контакти, на комуникација и на консултации. Што ќе се случува понатаму ќе зависи од него“, рече Груевски.

Обвинувањата од опозицијата дека власта постојано го опструира евроинтерацискиот процес на државата за премиерот Груевски се резултат на недостаток на аргументи. „Земја која не е заинтересирана за влез во ЕУ не би се трудела толку многу да дојде до позитивен извештај и препорака за отворање на преговарачкиот процес. Знаете дека потоа пречката беше од страна на Грција и оти сме фокусиран на тој проблем. Но, да се каже дека оваа Влада не е заинтересирана за евроинтеграцијата е навистина обвинување без никаков аргумент, имајќи предвид колку многу закони се донесоа, колку многу активности се направени и разни други мерки со кои се унапреди процесот на европски интеграции и, пред се', се унапреди квалитетот на живот на граѓаните“, рече Груевски. „Напротив, оваа Влада е една од оние што се најмногу фокусирани и има најмногу активности поврзани со евроинтеграцијата. Токму оваа Влада заедно со сите други институции успеа да ги исполни сите потребни работи за добивање на визната либерализација, која е еден од чекорите кон европеизација на државата“, рече тој.

Груевски негира дека последните вработувања на припадници од немнозинското население во администрацијата се резултат на партиски договор со коалицискиот партнер ДУИ. „Нема никаков партиски договор, во прашање е спроведување на Рамковниот договор, односно програмата К-5, која предвидува секоја година да се зголемува бројот на вработени во администрацијата. Тоа е договорено во 2001 година со потпишување на Рамковниот договор за чие спроведување се залагаме сите. Не може и да се залагаме за спроведување и да не го спроведуваме“, укажа Груевски.

Тој информира дека веќе има идеи и се подготвуваат одредени промени за подобрување на системот за вработување согласно со Рамковниот договор, за чии слабости има укажувања.

„Веќе подготвуваме одредени промени и тестови така што работите ќе се придвижуваат кон подобро. Инаку, Рамковниот договор мора да се спроведува, бидејќи тоа е општоприфатено начело во државата, потпишан е, и е дел од Уставот. Можеби некому му се допаѓа, некому не, но кога е веќе потпишан и ставен во Устав, мора да се спроведува. Чекор по чекор ќе го подобруваме и квалитетот на приемот на нововработени. Свесни сме дека има одредени слабости, укажано е за тоа, но чекор по чекор и тоа ќе го подобриме“, изјави Груевски. (Н.Р.)