Македонија повторно ќе извезува автобуси

Груевски најави дека белгиската компанија за производство на автобуси „Ванхол“ до крајот на следната недела ќе почне со изградбата на фабрика во земјава

Белгиската компанија за производство на автобуси „Ванхол“ до крајот на следната недела ќе почне со изградбата на сопствена фабрика во Македонија. Со оваа инвестиција премиерот Никола Груевски најави дека ќе се отворат 400 нови работни места и ќе го зголеми македонскиот извоз за 100 милиони евра.

„Македонија повторно ќе стане извозник на автобуси. Првата тура која ’Ванхол’ ја има веќе потпишано е за Америка, односно првите 500 автобуси кои ќе се произведат ќе одат за американскиот пазар и ќе бидат производ од Република Македонија“, изјави Груевски по промоцијата на нови книги во читалницата „1.000 книги“ во Градскиот трговски центар.

Според него, добро е тоа што Македонија порано имаше традиција во производството на автобуси така што белгиската компанија ќе може да најде соодветен кадар, но исто така новата инвестиција ќе биде можност и за младите високообразовни кадри.

„За ’Ванхол’ ова ќе биде добро затоа што ќе можат да најдат соодветен кадар, а и некои луѓе од ФАС ’11 Октомври’ исто така ќе можат да се најдат повторно на некои работни места кои во животот еднаш веќе ги работеле. Се разбира ова ќе биде добра шанса и за младите високообразовани кадри и за оние со средно образование, така што ќе има работа за сите“, нагласи Груевски.(Ек.Р.)