Опозицијата бара став од премиерот за „раната фаза“

Извештајот на ЕК денеска беше оценет од најпозитивен и најдобар во целиот регион до бајка пласирана од власта

Од најпозитивен, па до најдобар од сите други во регионот - се движеше оцената на претставниците на владејачките партии за извештајот на Европската комисија, со кој четврти пат ни дадоа препорака за преговори, овој пат не само за членство, туку и за спорот околу името. Годинашниот извештај за прогресот е навистина извештај за прогрес, искоментира евроамбасадорот Аиво Орав, нагласувајќи дека препораката што ја доби Владата годинава сепак е различна од претходните. На таа тема, сепак, никој од претставниците на владејачките партии не сакаше да зборува, спротивно на Јани Макрадули од СДСМ и Тито Петковски од опозицијата, кои јавно го повикаа премиерот да каже во кои политички правци ќе се движи натаму за да одговори на барањето на ЕК во „раната фаза“ на преговорите да го реши спорот со Грција. Петковски, пак, рече дека најавата за паралелни преговори за членство и за името се добра шанса за Македонија ако се знае да се искористи, но дека рамката што ни е понудена е многу ограничена, а се плаши дека тука тоа сериозно нема да се сфати. Како куриозитет, пак, Макрадули заигра на аргументот „македонски“ поздравувајќи го враќањето на зборот во извештајот на ЕК, иако не во обем како во 2005 и 2006 година, а Петковски го потсети Груевски на писмото во февруари 2011 во ОН во кое предлагал Република Македонија-Скопје, па го повика сега да го стори тоа што го мислел тогаш, нагласувајќи дека не сака да го прави предавник, туку го охрабрува за таков компромис.

Околу оцените за извештајот, Макрадули изјави дека секој што тврди дека тој е најпозитивниот досега „не живее во РМ, туку во светот на бајките“, а Ермира Мехмети од ДУИ се осврна на законот за бранителите, порачувајќи дека Европа кон која претендираме не признава вакви решенија, кои се исклучувачки. „Европа што сакаме да ја изградиме во нашиот микрокосмос е Европа на диверзитети, тоа е Европа на помирување и градење врз една заедничка основа“, рече Мехмети, симболички врзувајќи го извештајот на ЕК со Нобеловата награда на ЕУ и со констатација дека она што ние сега го правиме во Македонија (помирувањето) е тоа што го правела Европа по Втората светска војна.

Зијадин Сеља од ДПА рече дека на извештајот гледаат како на добра волја на ЕУ по секоја цена да ја внесе Македонија во членство, но дека нејзините добри намери владата ги злоупотребува за свои сопствени цели. Тој забележа исто ��ака на селективната правда во земјата, што ја констатира и ЕК, додавајќи дека секогаш кога има, како што оцени, монтирани политички случаи, се појавуваат заштитени сведоци без лик и идентитет. (С.Ј.)