15.10.2012, 14:09 ВМРО-ДПМНЕ го повлече законот за бранители
Од ДУИ најавија дека блокадата на парламентот, наместо со молк и одолговлекување на дискусиите, ќе ја продолжат со поднесување на над 5.000 амандмани
Пратеничката група на ВМРО-ДПМНЕ, по препорака на Извршниот комитет на партијата, го повлече законот за бранители од Комисијата за труд и социјална политика и веднаш поднесе барање за донесување идентичен закон, но по скратена постапка.
Промената на ритамот во непоколебливата стратегија на ВМРО-ДПМНЕ, апсолутно, не значи дека ќе се стави крај на собраниската фарса што трае веќе месец и половина. Од ДУИ најавија дека блокадата на парламентот, наместо со молк и одолговлекување на дискусиите, ќе ја продолжат со поднесување на над 5.000 амандмани.
Според Деловникот, законот за бранители сега оди на пленарна седница, најверојатно на 29 октомври, каде што ќе се гласа за потребата од негово донесување. За да се врати повторно во законодавното матично тело, каде во второто читање ќе следи директна амандманска расправа, потребно е да гласа мнозинството од присутните пратеници, што значи дека може да помине само со аманет на ВМРО-ДПМНЕ.
Пратеникот Веле Ѓорѓиевски вели дека со овој потег ВМРО-ДПМНЕ докажува дека го остварува она што ќе им го вети на граѓаните.
„Бевме доволно трпеливи. Комисијата за труд и социјална политика е блокирана и принудени сме на ваков потег. Сметаме дека разумот на крајот ќе надвладее и законот ќе биде донесен, затоа што меѓу бранителите од 2001 година имаше припадници од сите националности“, рече Ѓорѓиевски. (Н.К.)
|
