(ФОТО) Македонија шефува со регионот

Едногодишното претседателство со процесот за соработка во Југоисточна Европа е во наши раце

ФОТО: Киро Попов

Македонија го презема едногодишното претседателство со процесот за соработка во Југоисточна Европа (ПСЈИЕ), во кој членуваат 12 земји. Според парламентарниот спикер Трајко Вељановски, ПСЈИЕ израсна во автентичен глас на регионот, кој во европски контекст е прифатен како адекватен и динамичен форум за дијалог и соработка, и во кој парламентарната димензија има значајна и забележителна улога.

„Доколку постои заедничка волја, подготвени сме во текот на македонското претседателство да ги координираме напорите за создавање на парламентарно собрание, како еден од столбовите на ПСЈИЕ“, истакна Вељановски на денешната конференција „15 години од парламентарната димензија на ПСЈИЕ - минатото, сегашноста и европската иднина на Регионот“.

Претседателот на македонското Собрание најави состанок на КОСАТ (Конференцијата на парламентарните комисии за европски интеграции и прашања на државите опфатени со процесот за стабилизација и асоцијација), редовни шестмесечни размени на ставови, Меѓународни конференции на Денот на Европа, а претседавањето ќе го завршиме со конференција на претседателите на парламентите во мај 2013 година во Охрид.

„Покрај се' она што го имаме како негативно наследство од минатото, во име на иднината, ние како парламентарци, можеме и мораме да го надминеме сето она што не попречува во развојот на добрососедските односи и регионалната соработка. Она што се случуваше и случува во регионот и неговото соседство, очигледно покажува дека сме неделив дел од европската економско-социјална и безбедносна стабилност. Ние и' требаме на Европа и Европа ни треба нам“, поентираше Вељановски.

Заменик-министерот за надворешни работи, Зоран Петров, соопшти дека ќе бидеме фокусирани кон јакнење на регионалната соработка во која ќе доминира европската перспектива. Приоритетни области на македонското претседавање се соработката во областа на економијата, науката и образованието, културата и заштитата на животната средина, рече Петров.

На вчерашната конференција зборуваа и Ѓерѓ Мура од Регионалниот совет за соработка, Хајнц Бонгарц - претставник на „Фридрих Еберт Стифтунг“, професорот Димитар Мирчев и Петра Блес, поранешен заменик-претседател на германскиот Бундестаг, кои меѓудругото, и' посакаа успех на Македонија при претседателствувањето. Заедничката порака од Скопје е дека местото на земјите од ЈИЕ им е во Ев��опа.

Првата конференција на претседателите на парламентите на државите-членки на Процесот за соработка во ЈИЕ е иницирана од Парламентот на Грција и одржана во Атина на денешен датум пред 15 години. (Г.А.)