Груевски убеден во победа на локалните избори

Лидерот на ВМРО-ДПМНЕ констатира дека на СДСМ му оди тешко потрагата по кандидат за градоначалник на Скопје

„ВМРО-ДПМНЕ сигурно ќе победи на наредните локални избори“, уверен е претседателот на партијата и премиер, Никола Груевски. Задоволен од тоа што го сработиле вмровските градоначалници, од посветеноста и чесноста во работењето, Груевски не се чудел што на СДСМ му требало толку време за да најде кандидат за градоначалник на Скопје.

„Кога шетам низ проширените нови булевари, кога ги гледам новите паркови, новите објекти, административни згради, новите работи што Скопје го направија многу поубав и вистинска метропола, сфаќам зошто СДСМ толку време не може да избере кандидат за градоначалник на Скопје. И кога гледам колку нови луѓе ни се приклучуваат во ВМРО-ДПМНЕ, квалитетни луѓе од сите општествени слоеви и социјални групи, и колку масовно приоѓаат кон нас, пред се' заради тоа што го правевме, заради нашиот труд, енергија, дела и резултати, сфаќам и зошто во СДСМ практично не само што не можат да изберат кој да биде кандидат за градоначалник, туку имаат сериозен проблем, затоа што секојдневно се караат меѓу себе кој да не биде“, рече Груевски на денешниот собир во хотел „Континентал“, каде што им беа поделени книшките на новите партиски членови, со што бројката во Скопје се искачила на 40 илјади.

Тој посочи на статистиката на „Гугл“, според која заинтересираноста на странските туристи за Македонија, особено за Скопје денес е зголемена за 600-тини пати во споредба со 2006 година.

„Тоа говори дека работата на градоначалниците во Скопје, на чело со Коце Трајановски, дава резултати и Скопје го прави многу поинтересен и попривлечен град, како за туристите така и за неговите жители“, анализира премиерот.

Во преполната сала на хотелот, каде што озвучувањето беше толку слабо, па поголемиот дел од гостите не можеа да ги слушнат говорниците, беа градоначалникот на Скопје, Коце Трајановски, Ивица Коневски од Аеродром, кој е и претседател на Градскиот комитет, независниот Владимир Тодоровиќ од Центар, повратникот Марјан Додовски...

„Градот Скопје е ВМРО-вски град. Градоначалникот на градот и уште шест од 10 општини имаат градоначалници од редовите на ВМРО-ДПМНЕ. Тоа не е случајно, туку е плод на добриот избор за градоначалници во 2005 и 2009 година, на добрите програми, но уште повеќе на реализацијата на тие програми“, посочи Трајановски.

Според Коневски, токму реализираните проекти придонесоа граѓаните да ја препознаат вистинската опци��а, и масовно да и' пристапуваат на партијата. „Членството во ВМРО-ДПМНЕ не претставува борба и залагање за сопствени интереси. Членството во нашата партија претставува борба за идеи, за концепти ставени во интерес на граѓаните. Вратите се постојано отворени за сите луѓе. Ние сме партија на обичниот граѓанин“. порача Коневски.

СДСМ: ВМРО-ДПМНЕ нема абер од промоција на кандидати

„Груевски заборава дека е претседател на партија која абер нема од промоција на своите кандидати за градоначалници. Не можат да најдат кадри ни со наводниот ‘бран‘, ниту пак преку конкурс“, возвратија од СДСМ на „пецкањето“ од Груевски.

Од СДСМ сметаат дека Груевски ја продолжува праксата со „силење“ пред своите да се обидува да го амортизира опаднатиот морал кај партиските војници на ВМРО ДПМНЕ.

„Очекувавме премиерот да и' соопшти на јавноста дали по менувањето на таблите на училиштата во Чаир, и споменикот на Хасан Приштина во Чаир е дел од новиот пазар со својот коалициски партнер ДУИ“, прашаа од опозициската партија. Оттаму укажуваат дека нивниот кандидат за градоначалник на Скопје ќе биде промовиран на 28 октомври, на големиот митинг на плоштадот „Македонија“. (Г.А.)