Дуо Стефановски гостува во Софија

Дуото ќе приреди целовечерен рецитал во Културно информативниот центар на Република Македонија во Софија

Дуото Стефановски, Емилија Ристевска Стефановска-флејта и Александар Стефановски – флејта, утревечер ќе приреди целовечерен рецитал во Културно информативниот центар на Република Македонија во Софија, Бугарија.

- На програмата ќе бидат застапени дела од нашиот репертоар, односно музичкиот опус архивиран во три ЦД-а, но и дела од Менделсон, Росини, Бах, Пијацола, изјави Емилија Ристевска Стефановска.

Дуото Стефановски има богата музичка биографија, особено се забележителни гостувањата во: Германија, Грција, Франција, Италија, САД, Норвешка, Турција, како и на нашите фестивали: „Охридско лето“, „Скопско лето“, „Битолско лето“, „Златна лира“, „Денови на македонската музика“ и Фестивалот на класична музика „Интерфест“ во Битола каде неодамна настапија со својот камерен оркестар „Интерарт“.

Настапот во Бугарија и одржувањето на музичкиот рецитал во културно-информативниот центар на Република Македонија во Софија е поддржан од Министерството за култура на Република Македонија.