(ФОТО) Награда за животно дело за Кенго Кума

Во рамките на Скопската недела на архитектура синоќа на светски познатиот архитект проф. Кенго Кума му беше врачена Наградата за животно дело

ФОТО: Киро Попов

Во Македонската опера и балет, синоќа на светски познатиот архитект проф. Кенго Кума му беше врачена Наградата за животно дело во архитектурата во рамки на Скопската недела на архитектура 2012.

Пред повеќе од 300 гости, јапонскиот архитект и професор Кенго Кума, одржа и предавање за работата на неговото биро, претставувајќи ги сите поважни проекти работени ширум светот. Освен презентацијата на проектите, Кума говореше за процесот на неговата работа и водечката идеја во целокупното творештво.

- Човекот не може да биде одделен од природата, токму затоа природата е она што е неизмерна инспирација, рече Кума.

Според него, неопходно е да се започне од малите работи бидејќи луѓето полесно се поврзуваат со нешто што има човечки размер и е веќе осознаено. Токму затоа во огромен дел од неговите објекти, главен материјал е дрвото, каменот, водата, а подеднакво им се посветува и на големите проекти и на еден сад од оризова хартија.

Нагласи дека особено го цени Кензо Танге и неговиот пристап во урбанизмот, и оти секој треба да се обидува производот на неговата работа да биде што е можно подолговечен, како што тоа го правеле „метаболистите“.

Наградата за животно дело во архитектурата, на Кума му ја врачија организаторите на Скопската недела на архитекура кои изјавија дека неговото писуство и предавање ќе биде инспирација уште долго време и мотивација никогаш да не се престане да се бара вистината во архитектурата.

Доделувањето на наградата беше во организација на Скопската недела на архитекура и Јапонската културна фондација во Виена.

Во фоајето на МОБ беше претставена и изложбата “Кенго Кума: одбрани проекти”.