15.10.2012, 12:19 Одложена седницата на Комисијата за труд и социјала
Седницата е пролонгирана за два часа на барање на пратеникот на ВМРО-ДПМНЕ Веле Георгиевски
Почетокот на Собраниската комисија за труд и социјална политика е одложен за два часа на барање на пратеникот на ВМРО-ДПМНЕ Веле Георгиевски кој најави дека неговата пратеничка група ќе го повлече законот за бранители од редовна постапка.
Претседателката на Комисијата Цветанка Иванова седницата ја одложи за два часа и таа според тоа треба да започне околу 13 часот.
Извршниот комитет на ВМРО-ДПМНЕ вчера и препорача на својата пратеничка група да го повлече од процедура во редовната постапка Предлогот за донесување закон за посебните права на припадниците на безбедносните сили на Република Македонија и за членовите на нивните семејства и повторно да го поднесе во скратена постапка до Собранието на Република Македонија.
Исто така, Комитетот препорачува пратениците да се заложат за ограничување на дискусиите во новата скратена постапка со цел да се спречи злоупотребата на Деловникот и одолговлекувањето на дискусиите.
Координаторот на пратеничката група на ДУИ Талат Џафери со молчење и со читање делови од книги, закони и Уставот ја одолговлекуваше работата на Комисијата и го попречуваше донесувњето на законот за бранители.
По одложувањето на комисиската седница денеска тој не сакаше да коментира каков ќе биде ставот на ДУИ и како оваа партија ќе постапи доколку законот за бранители биде поднесен повторно од пратеничката група на ВМРО-ДПМНЕ, но по итна постапка според препораките на Извршниот комитет на партијата.
- Кога беше поднесен законот кажавме дека тој не ги исполни потребите на сите граѓани на Република Македонија и како таков не треба да се донесе. Кажавме дека ќе ги искористиме сите институционални можности да го попречиме можното донесување на законот. Понатамошна дебата е беспредметна бидејќи денеска поднесувачот на законот најави дека ќе го повлече, рече Џафери
|
