15.10.2012, 14:15 Жените земјоделки бараат учество во аграрната политика
Жените земјоделки имаат потреба од економска сигурност и општествено признание. Тие заслужуваат многу поголема афирмација како столб на семејството и чувари на македонската традиција, се грижат за домот, децата, храната,... Покрај поддршката од владините институции и невладиниот сектор, посочија дека е неопходно сами да се здружат и активно да се вклучат во креирањето на аграрната политика. Ова е пораката што беше упатена по повод Меѓународниот ден на руралната жена што се одржува во комплексот „Етно село“, Кумановско. „Ние сме двигатели на семејството, постојано и рамноправно работиме со нашите татковци, мажи, браќа, синови. Едукацијата и воспитувањето на децата е во наши раце, одржувањето на домаќинството е исто така наша обврска, како и работата на поле и обезбедувањето егзистенција. Оттука, не ни преостанува ништо друго туку да се здружиме и наместо срамежливо, со кренати глави да се бориме за нашите права и интереси“, изјави Љубица Џониќ, земјоделка и член на Управниот одбор на Федерацијата на фармери.
Според претседателот на Федерацијата на фармери Андрија Секуловски, загрижува малата вклученост на жените во земјоделските здруженија, во бизнисот и во донесувањето одлуки за развој на земјоделството.
„На жените од руралните средини отпаѓаат 1,6 милијарди или преку четвртина од вкупното светско население. Произведуваат речиси половина од храната, до 80 отсто во Африка, 50 проценти во Азија и околу 40 отсто во Јужна Америка и западните земји. Овие и други слични податоци се доволен поттик и нашите земјоделки да се обединат и да се изборат за своите права, да бидат поактивни и вистински лидери, придвижувачи на земјоделскиот процес“, истакна Секуловски. (С.Н.)
|
