Белгија се` поблиску до распад

Успехот на фламанските сепаратисти на локалните избори во Белгија нема да има непосредни последици за функционирањето на кралството, но претставува чекор поблизу кон поделба, сметаат белгиски аналитичари.

„Белгија се исплаши“, гласи насловната страница на бриселски „Соар“, ден откако сепаратистистот Барт Де Вевер однесе надмоќна победа во Антверпен и неколку други градови во Фландрија.

Де Вевер и неговата Нова фламанска алијанса (Н-ВА) отворено се залагаат за одвојување на богатата Фландрија од помалата, сиромашна Валонија во која се зборува француски. Идниот градоначалник на најпросперитетниот град во Белгија веднаш му порача на сојузниот премиер, социјалистот Елио ди Рупо да се подготви за конфедерализација на Белгија и оти Фландрија нема да плаќа даноци од кои се финансира сиромашниот југ.

Ди Рупо во обраќањето до јавноста се обиде да ја минимализира победата нагласувајќи дека се работи за локални избори кои нема да ја променат националната политика.

- Владата моментно е фокусирана на планот за реформи, а локални избори и онака не очекуваат за две години, изјави Ди Рупо, франкофонски потомок на италијански емигранти кој лани едвај успеа да состави влада. Добриот резултат на Н-ВА на парламентарните избори во 2010 година и одбивањето на Де Вевер да влезе во влада со Валонците беа главна причина што Белгија 17 месеци немаше влада се додека Ди Рупо не успеа да добие поддршка од валонски и фламански социјалисти.

- Ова беа само локални избори, но не треба да се лажеме: триумфот на Н-ВА може опасно да ја дестабилизира државата, вели Беатрис Делво главен уредник во „Соар“ во денешниот уводник. Она од што сите се вознемирени е дека дополнително ќе зајакне таа партија до парламентарните избори во 2014 година по што ќе биде невозможно да се формира влада без исполнување на неговото барање за конфедерација. Делво додава дека тоа сценарио може да се спречи доколку социјалистите од двете лингвистички бариери добро размислат и со програма за сериозни реформи да му ја вратат надежта на народот за заедничка иднина.