15.10.2012, 15:43 Фетел во Ферари до 2014 година
Според Би-Би-Си, трансферот на лидерот во Формула 1 во италијанскиот тим ќе зависи од пласманот на Ферари во следната сезона
Ден по освојувањето на трката за Големата награда на Јужна Кореја во Формула 1, во јавноста одекна веста дека Себастијан Фетел размислува за напуштање на Ред бул и за преминување во тимот на Ферари. Според информацијата што ја објави Би-Би-Си, кој се повика на извори од таборот на италијанскиот тим, трансферот на двократниот светски шампион би можел да се случи во 2014 година. Дали Германецот и неговиот најголем конкурент во моментов, Фернандо Алонсо, кој заостанува шест бода на вкупниот поредок, ќе станат тимски колеги ќе зависи од пласманот на Ферари во следната сезона.
Иако за многумина оваа вест беше интересна токму поради ривалството меѓу Фетел и Алонсо, сепак, претседателот на Ферари, Лука ди Монтеѕемоло, веднаш го демантира доаѓањето на Фетел.
„Моето размислување и понатаму останува непроменето - не посакувам два петла во ист кокошарник. Тоа не ми се допаѓа, бидејќи може да доведе до нестабилност на тимот“, изјавил тој за италијанското Радио 1.
Единствената реакција од Ред Бул во врска со евентуалното заминување на нивниот возач во Ферари е неодамнешната на советникот Хелмут Марко, според кој неговиот тим не може да го спречи Фетел ако тој сака да си замине.
|
