Захариев останува директор на Бирото за лекови

Илчо Захариев останува директор на Бирото за лекови, тврдат неофицијални владини извори. Иако пред една недела на Захариев му се тресеше директорската фотелја и неговото име се споменуваше во пакет со другите сменети директори, Владата, по се' изгледа, се премислува.

Директорскиот мандат, кој на Захариев му истече на 5 септември, е продолжен, но се' уште не се знае дали тој ќе биде че��иригодишен или, пак, пократко ќе го раководи Бирото за лекови. Владата, како што дознаваме, сака да добие во време откако увиде дека новиот директор што го токмеше не ги исполнува законските критериуми, да биде фармацевт и да има 10-годишно искуство, бидејќи е стоматолог со кусо работно искуство.

Од Владата ниту демантираат ниту потврдуваат дали Захариев и натаму останува прв фармацевт во државата. Премиерот Никола Груевски изјави дека на последната седница на Владата не било разгледувано кадровското решение на Бирото за лекови. До Захариев се' уште нема стасано решение дека останува директор, но во Бирото за лекови си работат исто како да му е продолжен мандатот на стариот директор.

Пред два дена во Владата беше усвоен нов Закон за хемикалии, кој е усогласен со ЕУ-стандардите, а во минатиот мандат на Захариев се донесоа уште три нови закони за лекови, за опојни дроги и за прекурсори. Беа скратени постапките за регистрација на лекови најмногу до девет месеци, а се донесе законска рамка и за хербалните лекови. (Ј.Ј.)