И земјиштето за хотели по едно евро

Еден квадрат државно земјиште на кое е предвидена изградба на хотели или објекти за индустрија и стопанство ќе се продава на лицитација со почетна цена од едно евро. Ваква одлука донела Владата на последната седница, со цел да се стимулира БДП и нови вработувања, но и во интерес на развој на туризмот. Одлуката треба да стапи во сила деновиве.

„Тоа е драстично намалување на почетната цена, која ��игурно нема да биде и конечна. На некои атрактивни локации ќе има крупни наддавања и цената, веројатно, ќе биде повисока, но на понеатрактивните, за кои немаше интерес или беа прескапи за потенцијалните инвеститори, сега ќе има можност преку симболична цена да се дојде до земјиште на кое ќе може да се изгради ф��брика и да се вработат луѓе“, рече вчера премиерот Никола Груевски.

Тој нагласи дека одлуката ќе даде стимул за изградба на нови капацитети во туризмот, поради што хотелиерството е ставено во групата поврзана со изградба на стопански капацитети. Истовремено ќе се поттикнат и домашните инвеститори да градат стопански објекти на земјиште со симболична цена, со што тие веќе нема да бидат нерамноправни со странците, кои можат да инвестираат во технолошко-индустриските развојни зони.

Министерот за транспорт и врски, Миле Јанакиески, информираше дека низ државава има неколку локации со земјиште за изградба на стопански и индустриски објекти. Дел од нив се во Скопје, поточно во општина Ѓорче Петров, во индустриската зона Жабени во Битола, како и во делови од Валандово. Јанакиески најави дека во соработка со општините и со другите надлежни институции штом ќе бидат создадени можности сите останати локации со таква намена ќе бидат ставени на продажба преку јавно наддавање. (Дс.Т.)