Фуере и' помага на Антикорупциска

Евроамбасадорот побара од Владата ефективна, а не само декларативна борба против корупцијата

Катица Чангова

Ерван Фуере и' помага на Државната комисија за спречување на корупцијата во наоѓање решенија за финансиските и за статусните проблеми предизвикани од коригираниот буџет и најавените законски измени. Вчерашната мисија на евроамбасадорот за поддршка на оваа контролна институција во сферата за спречување на корупцијата и криминалот беше успешна, но само во еден дел. Лично премиерот Никола Груевски соопшти дека Антикорупциска ќе ги добие бараните 1,9 милиони денари. Но, Владата и натаму опстојува на мислењето за четиригодишен мандат и за професионализација.

На вчерашната средба со евроамбасадорот антикорупционерите ја изразија загриженоста од скусените финансии, кои станаа пречка за елементарно функционирање и од новите решенија што го прават неизвесен нивниот мандат, односно предвидуваат разрешување на овој состав за помалку од пет месеци.

Апелирајќи до Владата за покривање на кусокот кај Антикорупциската комисија, Фуере побара од Владата ефективна, а не само декларативна борба против корупцијата. „Корупцијата се посочува како сериозен проблем и во досегашните извештаи нa ЕК за државата. Затоа улогата на Антикорупциската комисија во борбата против корупцијата ја сметаме за суштинска. Ние сме загрижени за неколку работи. Жално е што буџетот на Комисијата не беше зголемен, туку е редуциран за околу 20 отсто. Овој потег не е во согласност со заложбата на Владата да осигура ефикасна борба против корупцијата“, предупреди евроамбасадорот Фуере. Според него, тоа го поставува и прашањето за владините приоритети во трошењето јавни пари.

„Апелираме до Владата не само да ги врати средствата намалени со ребаланост, туку и да обезбеди доволно ресурси Комисијата ефективно да ја извршува својата работа. Со тоа Владата ќе потврди дека декларираната посветеност во борбата против корупцијата ќе биде преточена во дело“, нагласи Фуере по средбата со претседателот на Државната комисија за спречување на корупцијата. Илми Селами го информираше Ерван Фуере дека сметката на Антикорупциска е попразна за 3,4 милиони денари, а оти тие бараат минимални 1,9 милиони денари за покривање на комуналните трошоци и за исплата на месечните хонорари. „По препорака на Министерството за финансии, од каде што укажаа оти е направен превид, изготвивме и проследивме информација до Владата за потребните пари. Се надевам дека нашите барања ќе бидат прифатени“, рече Селами.

Во однос на предложените измени на Законот за спречување на корупцијата, евроамбасадорот ги поздрави напорите на Владата и на Министерството за правда за професионализација. Притоа потенцира дека Европската комисија е загрижена од некои предлози, како што се оние за покусите мандати на постојниот антикорупциски состав.

„Предлогот за кратење на мандатот од пет години на четири не доаѓа од Европската комисија и немаме мислење по тоа. За нас е приоритет предложените измени да овозможат ефективна улога на Комисијата во иднина. Тоа што го очекуваат и граѓаните е институцијата да има доволно ресурси за соодветно извршување на функцијата“, посочи Фуере.

Владата не отстапува од скратување на мандатот за членовите на Антикорупциската комисија, кои во иднина ќе бидат професионалци. Според Груевски, ставот на Владата во однос на ова прашање е ист со ставот на многу други институции, меѓу кои и Европската унија.

Според информации на „Утрински весник“, новите измени на Законот за спречување на корупцијата се наоѓа пред владините комисии, а во текот на наредната недела ќе бидат доставени и во парламентарна процедура.