Ќе се градат пет фабрики во гостиварско Зубовце

Камен-темелникот на првиот стопански комплекс, не само во регионот туку и во државата, беше поставен во присуство на премиерот Никола Груески

ГОСТИВАР - Пет мини-фабрики за производство на леб и бели печива, за преработка на месо и на кафе, за електропроизводи и за метал по две години ќе бидат изградени во атарот на гостиварското село Зубовце. Новите погони на месната индустрија „Карне М“, „Интер кафе“, „Дамјан стил“, „Амиго „ и „Елком“ ќе бидат според стандардите на ХАСАП.

Според проекцијата на инвеститорите, младите гостиварски бизнисмени: Михајло Михајлоски, Ивица Димитриески, Ѕвонко Михајлоски, Вуке Срезоски, Ристо Ристоски и Влатко Анѓелкоски очекуваат за една година да ги активираат погоните. На почетокот ќе се вработат стотина лица, пред се', од селото Зубовце и од околните населби.

„Сакаме да покажеме како со слога и храброст се остваруваат ваквите проекти. Со тоа да им ја подотвориме вратата и несебично да им го покажеме патот и на други фирми од регионов, дека сега е можно да се реализираат вакви идеи“, истакна Михајло Михајлоски, сопственик на фирмата за преработка на месо „Kарне М“, идеен творец на овој проект.

Камен-темелникот на првиот стопански комплекс, не само во регионот туку и во државата, беше поставен во присуство на премиерот Никола Груески и министерот за транспорт и врски, Миле Јанакиески. Погоните ќе зафаќаат површина од 10.000 квадратни метри, со можност за двојно проширување.

Груевски истакна дека бизнисмените донеле мудра одлука за изградба на индустриски комплекс и тоа во тешки услови на светска економска криза, кога најголем дел од компаниите во светот ги стопираат своите инвестиции. „И оваа криза, како и секоја има свој крај“, потенцира Груевски.

„Ова е вистински начин за забрзан развој на руралните општини, како што е Врапчиште. Ги охрабруваме бизнисмените да го развиваат бизнисот, а ние ќе им помагаме во рамките на надлежностите“, истакна Бајрам Кадрија, градоначалник на општина Врапчиште. Тој очекува оваа иницијатива на бизнисмените да биде предизвик и за други да почнат некаков бизнис во општина Врапчиште, која нуди одлични услови. На тој начин, нагласи Кадрија, „ќе се стопира миграцијата, не само село - град, туку и иселувањето во странство“. (К.К.)