Прекин на молчењето пред медиумите

ГОСТИВАР - При завчерашната посета на Гостивар, претседателот Ѓорге Иванов го прекина молчењето и со задоволство одговараше на новинарски прашања.

За спорот со името со соседна Грција, Иванов потенцира дека процесот трае во континуитет и дека постојано се во контакт со преговарачот Јолески, кој го известува за сите детали. Претседателот Иванов очекува олеснувачот во преговорите, Метју Нимиц, да изготви предлог. „Забелешките се однесуваат, пред се', на она што е во наш интерес, бидејќи тоа е процес во кој секоја страна ги има своите адути и кога трае тој процес, не е пожелно да се откриваат деталите“, потенцира Иванов.

Претседателот на Македонија изрази надеж дека позитивната реторика на можниот иден министер за надворешни работи на Грција, Андреас Ловердос, одговорен за надворешната политика во ПАСОК, кој со тоа најавил помек однос спрема Македонците во Грција, ќе придонесе за трајно стабилизирање на македонско-грчките односи. „Ние како држава сме конструктивни, даваме позитивни предлози и нашиот однос спрема соседна Грција е добар“. (К.К.)