Иванов најави дека е можна лидерска средба за името
Кавадарци - „Како земја сме длабоко навлезени во евроинтегративните процеси. Имаме солиден тим и солидни кадри. Менувањето на човекот што ги раководеше процесите нема да влијае на евроинтеграциите“. Со ваков став од Кавадарци настапи шефот на државата, Ѓорге Иванов, по оставката на вицепремиерот, Ивица Боцевски.
Иванов го избегна прашањето дали ќе свика нова лидерска средба. Тој речиси на заминување од средбатанајави дека е можно наредната недела, пред посетата на Метју Нимиц, да има координации на државниот врв во Македонија.
Иванов вчера го посети Кавадарци. Се запозна со работењето на новата производна линија за густи сокови на „Кожувчанка“, со производствените капацитети на „ИГМ трејд“ и на винарската визба „Тиквеш“. Притоа, рече дека го искористил првиот слободен ден од неговиот претседателски мандат за посета на градот кој има стопански капацитети што можеле да бидат пример во Македонија. „Иако претседателот нема ингеренции во стопанството, сепак, создава амбиент во оваа сфера. Се уверив дека во Македонија има успешна приказна и дека состојбата во стопанството не е таква како што ја гледаме од дневните настани“, изјави Иванов. Притоа, рече дека при посета на странски држави ќе носи домашни успешни бизнисмени. (А.Д.) |
