Случајот на ОМО „Илинден“-ПИРИН тест за Стразбур
Зошто Софија не ја почитува одлуката на Судот за човекови права
Од нашиот дописник
Тони Гламчевски
Стразбур - Предметот ОМО „Илинден“-ПИРИН против Бугарија е се' уште без разврска во Стразбур. Полека, но сигурно, тој се претвора во „чувствителен политички случај“, за кој одбегнуваат да даваат изјави високите функционери на организацијата. По обидот во почетокот на годинава да се претвори во билатерален спор меѓу Македонија и Бугарија, денес тој се претвори во вистински тест за капацитетите на Советот на Европа во областа на спроведувањето на пресудите на Европскиот суд за човекови права. Тоа се случува во моментот кога најстарата паневропска организација слави 60 години од своето основање и десет години од почетокот на работата на постојаниот Европски суд за човекови права.
Комитетот на министрите во јуни одлучи дека во септември сака да го затвори како решен случајот ОМО „Илинден“-ПИРИН, не водејќи сметка дека Европскиот суд за правата на човекот нема донесено одлука околу повторните неуспешни обиди за регистрација на партијата.
Во најновиот додаток на мониторинг-извештајот за Бугарија изработен од украинскиот парламентарец Серхиј Холовати, јасно се вели дека „извршувањето на пресудата на Европскиот суд за правата на човекот во случајот ОМО ’Илинден‘-ПИРИН, се' уште не е спроведена од страна на Бугарија“. Во извештајот, Холовати потсетува дека станува збор за случајот со кој беше распуштена оваа политичка партија, која имаше цел да се „признае македонското малцинство во Бугарија“. Во пресудата од 20 октомври 2005 година, Судот од Стразбур заклучи дека распуштањето на партијата во 2000 година претставува кршење на член 11 од Европската конвенција за правата на човекот.
Позиција на ПС на СЕ драстично се разликува од последната одлука на Комитетот на министрите. Известителот на ПС на СЕ, кипарскиот пратеник Кристос Пургуридес, кој беше во мониторинг-посета на Софија, токму околу прашањето за начинот на кој Бугарија ги спроведува пресудите на Судот од Стразбур, смета дека овој случај најдобро сведочи за разликите во пристапите на двата органа на СЕ кога станува збор за извршувањето на пресудите:
„Една од областите во кои има најсериозни конфликти меѓу ПС и Комитетот на министрите е токму спроведувањето на пресудите на Судот. Во ПС на СЕ бараме пресудите на Судот да бидат спроведени брзо, без одложување и на ефикасен начин. Комитетот на министрите од негова страна им дозволува на земјите и владите, на кои Судот им рече дека ја прекршиле Конвенцијата за човекови права, да добијат на време, оставајќи им години и години пред да бидат принудени да ја исполнат пресудата“.
Пургуридес, притоа, нагласува дека ова не е нов проблем меѓу двата органа на Советот на Европа.
За својот 60. роденден на Советот на Европа се соочува и со друга институционална криза. На последната летна сесија, ПС на СЕ требаше да го избери наследникот на Тери Дејвис, генералниот секретар на Советот на Европа, но изборите беа одложени за септември. Причината е конфликтот меѓу ПС на СЕ со другиот орган на СЕ, Комитетот на министрите, кој отстрани двајца од четворицата кандидати за генерален секретар. Инаку, двајцата елиминирани кандидати се членови на ПС на СЕ. Според критериумите на СЕ, овие услови ги исполниле Полјакот Влоѓимјеж Чимошевич и Норвежанецот Тјобјорн Јагланд.
Но, Собранието дава отпор и се повикува на проблеми во процедурата, со барање да бидат повторно вратени во трката Унгарецот Матијаш Орши и Белгиецот Лук ван ден Бранд.
Летниот период се најавува како бурен за најстарата паневропска организација, на која не и' требаше ваков скандалозен избор на генерален секретар, во моментот кога бара нов здив и место под европското небо. Изборот е одложен до септемвриската сесија. |
