Шведска најавува дека визите ќе се укинат до крајот на годината
Бон - Шведскиот министер за миграции и азил, Тобијас Билстром, изрази очекување дека Европската комисија во средината на јули ќе поднесе предлог за визна либерализација за Македонија, Србија и Црна Гора. „Во средината на јули, Европската комисија ќе излезе со законски предлози кои ќе овозможат безвизен режим до крајот на 2009 година, за оние земји кои дотогаш ќе ги остварат потребните услови за тоа. Тука, секако, мислам на Македонија, Србија и Црна Гора“, рече Билстром. Тој истакна оти очекува дека потоа натамошната процедура во соодветните работни тела на Советот на ЕУ ќе продолжи и пред летниот одмор.
Србија, според него, останува со ЕК да ги реши прашањата за контрола на пограничната линија со Косово, како и прашањето за издавање пасоши за граѓани на Косово. „Најважно е да се држиме до визните патокази. Тие се основните патишта на секоја земја кон визна либерализација. Секоја земја има свои специфични проблеми, но исполнувањето на условите зацртани единствено во визниот патоказ е клуч на се'“, заклучи Блистром. (МИА) |
