Претходен број

За кого ли агитираат партиите?

По Букурешкиот самит во април, земјава перманентно се наоѓа во изборна кампања, додека се' друго е во мирување

Соња Крамарска

Светнатите чевли на министрите и на пратениците повторно се лепат на кал откако пред еден месец тргнаа во поход за лов на гласови по наредба на своите партиски раководства. На три месеци до претседателските и локалните избори, партиската машинерија е забревтана толку силно што не остава простор за сомнеж дека „избори се ближат“.

Владејачката ВМРО-ДПМНЕ, која прва почна со одењето низ селата и градовите за време на штрајкот на просветните работници, вчера ја обвини опозицијата за предвремено почнување на изборната кампања. Портпаролот Александар Бичиклиски рече дека опозициските социјалдемократи вршат „најгруб притисок во градовите каде што ја држат локалната власт“. „СДСМ предвреме ја започна кампањата за претстојните избори и се обидува вработените во општинските администрации и во јавните претпријатија да ги стави под своја команда“, обвини Бичиклиски.

Социјалдемократите веднаш возвратија дека ВМРО-ДПМНЕ е партијата што врши притисоци, бидејќи сите инструменти на власта се во нивни раце. „Министрите, пратениците и други функционери на ВМРО-ДПМНЕ со службени возила и народни пари предвреме ја започнаа кампањата цели три месеци пред одржувањето на изборите“, изјавија од СДСМ преку партиско соопштение. „Сите инструменти на власта се во нивни раце, вклучувајќи го и нивното омилено средство за закани, Министерството за внатрешни работи“, обвинија опозициските социјалдемократи.

На обичниот граѓанин, пак, не му преостанува ништо друго, освен заклучокот дека земјава по Букурешкиот самит се наоѓа во постојана изборна кампања. Се' друго е ставено во мирување и е подредено на определбата на десноцентристичката коалиција предводена од ВМРО-ДПМНЕ да триумфира и на претстојните претседателски и локални избори и ��а го дотолчи политичкиот противник.

Портпаролот на ВМРО-ДПМНЕ, Александар Бичиклиски, на нашето вчерашно прашање дали и владејачката партија не е „соучесник“ во предвременото започнување на изборната кампања, рамнодушно констатира дека нивните средби со граѓаните се дел од програмата на партијата и дека тие се одвивале со иста динамика веќе пет години.

Наспроти агресивната кампања, недостасуваат имињата на кандидатите за клучните функции чие освојување ги натера партиите во предвремено агитирање. Се' уште не се знае кои ќе влезат во трката за претседател на државата и за градоначалник на главниот град на државата. Овде партиите се закопаа во бесмислени тактики или, пак, од толку „силно и бројно“ членство со кое се фалат, ниту ВМРО-ДПМНЕ ниту СДСМ немаат соодветен кандидат за највисоката државна функција.

Опозициската СДСМ барем ги соопшти имињата на кандидатите за градоначалници, додека владејачката ВМРО-ДПМНЕ даде скратена листа на кандидати за таа функција, а преостанатите допрва ќе ги утврдува. Либерално-демократската партија, пак, вчера соопшти дека назначиле изборен штаб и дека идниот месец ќе ги обелодени кандидатските листи и истовремено се пофали дека добиле две звучни имиња во своите редови: професорот Ѓорѓи Марјановиќ и поранешната претседателка на Хелсиншкиот комитет за човекови права, Мирјана Најчевска.

Партиската кампања, која започна многу порано отколку што е потребно, ќе мора да трае до завршувањето на изборите, а тоа е самиот крај на март (29). Но, ако се има предвид дека за избор на претседател на државата обично се потребни два круга гласање и дека тие се проследени со повеќедневни процедури за жалби и поплаки, тогаш е јасно на што ќе биде потрошена „политичката пролет“ во Македонија.

Оваа година имавме избори на 1 јуни, а идната година, кога ќе се наврши една година од тој датум, партиската машинерија се' уште ќе биде жешка по претседателските и локалните избори. Тоа, пак, значи дека од реформите и од преговорите за името, кои се крунски услов за напредок на земјава, нема да има ништо.