Обид за самоубиство или за убиство на затвореник во „Идризово“?
Игор Мирчевски, осуден на доживотна казна затвор, беше пронајден сиот во крв во затворската ќелија
Даниела Трпчевска
Кичевецот Игор Мирчевски, осуден на доживотна казна затвор, завчера беше пронајден сиот во крв во ќелијата на третиот кат во најголемиот затвор во земјава „Идризово“. Поради исечениците на лицето и вратот, тој веднаш бил пренесен во домската амбуланта, а потоа префрлен на лекување во Ургентниот центар. Според Управата за извршување санкции, триесетгодишниот затвореник од Кичево, осуден за грозоморното убиство на Митра Силјановска и Радослав Божиновски од село Малковец, се обидел да си го одземе животот. Полицијата ја проверува и другата можност – дека некој од затворениците се обидел да го убие Мирчевски поради наводен долг. Токму таква писмена изјава тој дал пред инспекторите на МВР, по што поради подобрената здравствена состојба повторно е вратен во затворот „Идризово“.
Целата приказна започнала завчера попладне околу 14 часот кога чуварите го забележале Мирчевски како лежи на креветот во локва крв. Имал исеченици на лицето и вратот, поради што веднаш бил однесен во амбулантата. Оттаму, пак, со асистенција на МВР бил префрлен во Ургентниот центар каде што биле санирани неговите повреди.
„По укажаната медицинска помош, затвореникот во моментов е надвор од животна опасност. Собата е обезбедена, а крим техника и истражен судија извршија увид“, велат од Управата за извршување санкции, додавајќи дека станува збор за обид за самоубиство. Според директорката на управата, Лидија Гаврилова, затвореникот се чувствува добро и повторно е вратен во затворот. Вчера, додава таа, било пронајдено и проштално писмо упатено до неговите родители, но допрва полицијата ќе ја утврдува неговата автентичност. Надлежните не знаат со каков остар предмет се нанесени исечениците на Мирчевски, но велат „среќа што веднаш го виделе чуварите, оти можел да искрвави и да биде предоцна“.
Извори од полицијата потврдуваат дека Миршевски се чувствува добро и дека со него веќе разговарале инспекторите. Во писмената изјава дадена за нив тој тврдел дека бил нападнат од друг затвореник за наводен долг од 150 евра.
„Состој��ата на Мирчевски е добра, тој е контактибилен и инспектори веќе разговараа со него. Тој тврди дека не станува збор за самоубиство, туку дека некој го нападнал поради наводен долг“, вели помошник-министерот за односи со јавност во МВР, Иво Котевски. Прошталното писмо кое дури вчера било испратено до МВР заедно со досиејата на осудениците, допрва ќе се анализира и ќе се утврдува кој го напишал и каде било пронајдено.
Игор Мирчевски е на издржување казна доживотен затвор од 17 јануари 2005 година во „Идризово“. Тој заедно со Анте Ристески на судскиот процес што се одржа во март 2005 година, во судот во Кичево беа осудени на доживотен затвор поради свирепото убиство на Радослав Божиновски и на Митра Силјановска. Пред неколку месеци во јавноста се појавија сомнежи дека двете момчињеа се неправедно осудени за убиството на Силјановска, поради што нивниот адвокат бараше и преотворање на постапката. Но, Апелациониот суд во Гостивар пред еден месец одлучи да ја отфрли жалбата на Мирчевски за нов судски процес, со образложение дека не се доставени нови цврсти докази. Адвокатот Спасе Стефановски вчера ни изјави дека за инцидентот во „Идризово“ дознал од медиумите и дека никој не го известил официјално што се случило со неговиот клиент. (Д.Т.) |
