Претходен број

Едиторијал

Кризата ја расипа предизборната идила

И покрај оптимизмот со кој сме заплиснати деновиве од сите страни, особено од власта која се обидува колку што е можно повеќе предизборно да им се додвори на гласачите, во реалноста некако и не ни цветаат рози на економски план. Првите луѓе на Владата секојдневно не' убедуваат дека Македонија не била многу засегната од светската криза, а што е уште пострашно, така и се однесуваат пред очите на јавноста. Како да нема криза насекаде околу нас, туку таа да е некаде далеку, на некоја друга планета. Несериозно, па дури и смешно звучат нивните изјави од типот дека кризата ќе морала да се почувствува и во Македонија, ама Владата веќе ги презела сите мерки за таа помалку да влијаела негативно врз нашата економија.

Премиерот и министрите се' уште не сакаат храбро и одговорно да не' известат дека економскиот раст годинава ни во најубавите соништа нема да изнесува 5,5 проценти, ниту, пак, дека во државната каса ќе успеат да соберат приходи дури 2,5 милијарди евра. Таквите бројки сега веќе не звучат ни комично, туку повеќе би се рекло трагично, бидејќи и на најнеупатените им е јасно дека се само чиста илузија.

Не е дека главните играчи во Владата не седнале досега и не направиле нови математики за тоа како годинава вистински ќе се движи македонскиот БДП и колку пари реално ќе се слеат во буџетот. Впрочем, со такви пресметки веќе одамна излегоа сите држави во светот и за тоа транспарентно ги информираа своите граѓани, а релевантни прогнози даваат и меѓународните институции, и тоа ревидирани од ден на ден, бидејќи состојбата на економски план станува се' подраматична.

Не дека нашите власти не знаат оти многу компании го намалуваат производството, нивните нарачки се откажани, странските партнери се изгубени, се намалува индустриското производство и воопшто, ситуацијата само повеќе се влошува, а никако не тргнува на добро. И, конечно, не може тие да не гледаат оти во буџетот се слеваат многу помалку пари од оние што ги предвидоа и кои им се потребни за да ги остварат ветувањата што сега, како од ракав, им ги даваат на граѓаните.

Ама таквите неубави работи очигледно не се за кажување пред избори. Во овој период никако не смее да се зборува за криза, за лоши економски прогнози и за какви било проблеми на фармери или на стечајци. Тие теми сега не треба и не смее да се отвораат. Треба само да се информира за инвестиции и за нови странски компании кои, наводно, само што не почнале да ги градат своите фабрики во „Бунарџик“.

Сепак, и покрај сите обиди на власта да „избега“ од кризата и да се прави како да ја нема, да не постои, само со цел да не и' ја расипе идиличната предизборна слика, работите си излегуваат на виделина.

Завчера, на пример, јавноста успеа да дознае дека Владата влегува во ново задолжување од дури 32,5 милиони евра, пари кои ги зајми од домашни кредитори преку издавање едномесечна државна обврзница, а ќе треба да ги врати веднаш по изборите. Значи, на власта навистина и снема пари во буџетот, како што одамна ја предупредуваа многу аналитичари, па мора да се снаоѓа како што знае и умее за да дојде до потребните средства. И не само тоа, туку за овие пари плаќа и екстра- камата од дури 8,9 отсто, и тоа во време кога жестоко ја обвинува централната банка дека ги држи високи референтните каматни стапки од 7 проценти.

Впрочем, министерот за финансии минатата недела призна дека во буџетот се намалени приходите во однос на проекциите за околу 6,5 милиони евра. Тој тогаш кажа дека се работело за мал процент на неостварување настанат поради светската криза, но тоа „ни оддалеку не е нешто што би требало да не' загрижува“. Но, дали е така и дали и самите министри се убедени во оптимистичките изјави што ги даваат, засега е голем прашалник.